కలం, స్పోర్ట్స్ : ఫ్రెంచ్ ఓపెన్ (French Open) మహిళల సింగిల్స్ ఫైనల్ మ్యాచ్కు సర్వం సిద్ధమైంది. శనివారం జరిగే గ్రాండ్ స్లామ్ చరిత్రలోనే అత్యంత అరుదైన ఈ టైటిల్ పోరులో ఎనిమిదో సీడ్ మీరా ఆండ్రీవా (Mirra Andreeva), క్వాలిఫయర్ మాజా చ్వాలిన్స్కా (Maja Chwalinska) తలపడనున్నారు. గురువారం జరిగిన సెమీఫైనల్స్ మ్యాచ్లతో ఈ ఇద్దరు ఆటగాళ్లు ఫైనల్లో అడుగుపెట్టారు. కోర్ట్ ఫిలిప్-చాట్రియర్లో జరిగిన మొదటి సెమీఫైనల్లో 19 ఏళ్ల రష్యా స్టార్ ఆండ్రీవా 6-1, 6-3 తేడాతో మార్తా కోస్టియుక్ను మట్టికరిపించారు. రెండేళ్ల క్రితమే ఫ్రెంచ్ ఓపెన్ సెమీస్ చేరిన ఆండ్రీవాకు, ఒక గ్రాండ్ స్లామ్ టోర్నీలో ఇదే తొలి ఫైనల్ కావడం విశేషం. ఈ మ్యాచ్ గెలిస్తే, 2014లో మరియా షరపోవా తర్వాత ఫ్రెంచ్ ఓపెన్ గెలిచిన మొదటి రష్యన్ మహిళగా ఆండ్రీవా రికార్డు సృష్టిస్తారు.
మరోవైపు, పోలాండ్కు చెందిన 24 ఏళ్ల మాజా చ్వాలిన్స్కా గురువారం నాటి రెండో సెమీస్లో రష్యాకు చెందిన డయానా ష్నైడర్ను 7-6 (4), 6-4తో ఓడించి సరికొత్త చరిత్ర లిఖించారు. మ్యాచ్ పాయింట్ సాధించిన వెంటనే చ్వాలిన్స్కా ఆనందంతో కోర్టులోనే కుప్పకూలిపోయారు. అనంతరం మాట్లాడిన ఆమె, ఇది ఒక కలలా ఉందంటూ ఆ క్షణాలను ఆస్వాదించాలనుకుంటున్నట్లు చెప్పారు. కేవలం మూడు క్వాలిఫైయింగ్ రౌండ్లు ఆడి మెయిన్ డ్రాకు అర్హత సాధించిన చ్వాలిన్స్కాకు ఇది కెరీర్లో మూడో గ్రాండ్ స్లామ్ టోర్నీ మాత్రమే. అంతకుముందు 2022 వింబుల్డన్లో రెండో రౌండ్ చేరడమే ఆమె అత్యుత్తమ ప్రదర్శన. కాగా, పోలాండ్కు చెందిన ఇగా స్వియాటెక్ ఇప్పటికే ఇక్కడ నాలుగు సార్లు ఛాంపియన్గా నిలిచారు.
ఈ టోర్నీలో క్వాలిఫైయింగ్తో కలిపి ఆడిన 9 మ్యాచ్లలో చ్వాలిన్స్కా కేవలం ఒకే ఒక్క సెట్ కోల్పోయారు. మెయిన్ డ్రాలో టాప్-50 లోని నలుగురు క్రీడాకారిణులను ఓడించారు. ప్రస్తుతం 114వ ర్యాంకులో ఉన్న ఆమె ఈ టైటిల్ గెలిస్తే ఏకంగా 14వ స్థానానికి చేరుకుంటారు. అలాగే ఈ టోర్నీతో ఆమెకు భారీ ఆర్థిక ప్రయోజనం కూడా దక్కింది. ఇప్పటివరకు ఆమె కెరీర్ ప్రైజ్ మనీ సుమారు 8.6 లక్షల డాలర్లు కాగా, ఫైనల్ చేరడం ద్వారా ఆమెకు సుమారు 16 లక్షల డాలర్లు దక్కనున్నాయి. ఒకవేళ టైటిల్ గెలిస్తే అది ఏకంగా 32.5 లక్షల డాలర్లకు చేరుకుంటుంది.
Read Also: తెలంగాణను వణికిస్తున్న ఎబోలా.. అసలేంటీ వైరస్!
Follow Us On: Sharechat
