కలం, స్పోర్ట్స్ : భారత ఫుట్బాల్ జట్టుకు యూనిటీ కప్ (Unity Cup) లో నిరాశ ఎదురైంది. సెమీఫైనల్లో జమైకా చేతిలో భారత్ 0-2 తేడాతో ఓడిపోయింది. దీంతో ఫైనల్ అవకాశాన్ని కోల్పోయిన భారత జట్టు ఇప్పుడు థర్డ్ ప్లేస్ మ్యాచ్కు సిద్ధమవుతోంది. బ్రిటన్ గడ్డపై 2002 తర్వాత భారత్ ఆడిన తొలి మ్యాచ్ ఇదే కావడం విశేషం. ది వ్యాలీ స్టేడియంలో జరిగిన ఈ పోరులో జమైకా ఆరంభం నుంచే దూకుడుగా ఆడింది. మ్యాచ్ ప్రారంభమైన ఎనిమిదో నిమిషంలోనే జమైకా తొలి గోల్ సాధించింది.
భారత డిఫెన్స్ చేసిన చిన్న తప్పును కోర్ట్నీ క్లార్క్ ఉపయోగించుకుని అద్భుతమైన షాట్తో బంతిని గోల్పోస్ట్లోకి పంపించాడు. గుర్ప్రీత్ సింగ్ సంధు ప్రయత్నించినా ఆ షాట్ను అడ్డుకోలేకపోయాడు. ఆ తర్వాత కూడా జమైకా వరుస దాడులతో భారత జట్టుపై ఒత్తిడి పెంచింది. 17వ నిమిషంలో కహీమ్ డిక్సన్ మరో గోల్ చేసే అవకాశాన్ని సృష్టించాడు. అయితే గుర్ప్రీత్ అద్భుత సేవ్తో భారత్ను నిలబెట్టాడు. ఫస్ట్ హాఫ్లో భారత్ కొంతసేపు బంతిని నియంత్రించినా.. చివరి దశలో సరైన దాడులు చేయలేకపోయింది.
ర్యాన్ విలియమ్స్, ఛాంగ్టే, లాల్రిండికా ప్రభావం చూపలేకపోయారు. జమైకా గోల్కీపర్కు పెద్దగా పరీక్ష ఎదురుకాలేదు. సెకండ్ హాఫ్లో మాత్రం భారత్ మరింత ఉత్సాహంగా కనిపించింది. 53వ నిమిషంలో జమైకా డిఫెన్స్ చేసిన పొరపాటుతో భారత్కు మంచి అవకాశం వచ్చింది. రోషన్ అందించిన పాస్ను రహీం అలీ అందుకున్నాడు. ఆ తర్వాత ఛాంగ్టే గోల్ చేసినా.. రహీం అలీ ఆఫ్సైడ్లో ఉండటంతో గోల్ను రద్దు చేశారు.
ఆ అవకాశం తర్వాత భారత్ ఆటలో వేగం పెంచింది. ఖలీద్ జమీల్ శిష్యులు వరుసగా దాడులు చేస్తూ జమైకాపై ఒత్తిడి తీసుకొచ్చారు. కొంతసేపు మ్యాచ్పై భారత్ ఆధిపత్యం చూపించింది. అయితే 78వ నిమిషంలో కహీమ్ డిక్సన్ మరో అద్భుత గోల్తో భారత్ ఆశలను దెబ్బతీశాడు. డిఫెండర్లను దాటుకుని తక్కువ ఎత్తులో కొట్టిన షాట్ నేరుగా గోల్లోకి వెళ్లింది. దీంతో జమైకా ఆధిక్యం 2-0కు చేరింది.
ఆ తర్వాత భారత్ తిరిగి పుంజుకోలేకపోయింది. మిగతా సమయాన్ని జమైకా సాఫీగా ముగించి ఫైనల్కు చేరుకుంది. ఈ మ్యాచ్లో (Unity Cup) నౌఫల్ పీఎన్, రికీ షబాంగ్ భారత సీనియర్ జట్టుకు అరంగేట్రం చేశారు. ఎడ్మండ్ లాల్రిండికా తొలి సారి స్టార్టింగ్ ఎలెవన్లో చోటు దక్కించుకున్నాడు. ఇక మే 30న జరిగే థర్డ్ ప్లేస్ మ్యాచ్లో భారత్ జింబాబ్వేతో తలపడనుంది. మరో సెమీఫైనల్లో నైజీరియా చేతిలో జింబాబ్వే ఓడిపోయింది.
Read Also: గోల్డ్ మెడల్తో చరిత్ర తిరగరాసిన ఈషా సింగ్
Read Also: పిల్లల్ని కనడం లేదు
