కలం, స్పోర్ట్స్: కార్డిఫ్ వన్డేలో టీమిండియా ఓ మోస్తరు స్కోరుకే పరిమితమైంది. టాస్ ఓడి మొదట బ్యాటింగ్కు దిగిన భారత్ (IND vs ENG).. ఇంగ్లండ్ బౌలర్ల ధాటికి 44 ఓవర్లలో 233 పరుగులకు ఆలౌట్ అయింది. క్రీజులో నిలదొక్కుకోవడానికి బ్యాటర్లు తీవ్రంగా శ్రమించారు. విరాట్ కోహ్లీ, శ్రేయస్ అయ్యర్ అర్ధశతకాలతో జట్టును ఆదుకున్నారు. దీంతో ఇంగ్లాండ్ విజయానికి భారత్ 234 పరుగుల లక్ష్యాన్ని నిర్దేశించింది.
తొలుత బ్యాటింగ్ చేసిన భారత్కు ఆశించిన ఆరంభం లభించలేదు. ఓపెనర్ శుభ్మన్ గిల్ 31 పరుగులు చేసి గస్ అట్కిన్సన్ బౌలింగ్లో అవుట్ కాగా, మరో ఓపెనర్ రోహిత్ శర్మ (26) విల్ జాక్స్ బౌలింగ్లో వెనుదిరిగాడు. ఆ తర్వాత క్రీజులోకి వచ్చిన రన్ మెషిన్ విరాట్ కోహ్లీ (Kohli) ఇంగ్లండ్ బౌలర్లను దీటుగా ఎదుర్కొన్నాడు. వన్డేల్లో తన అనుభవాన్ని చూపిస్తూ 66 బంతుల్లో 8 ఫోర్లతో 65 పరుగులు చేసి జట్టు ఇన్నింగ్స్కు వెన్నుముకగా నిలిచాడు. వన్డౌన్ బ్యాటర్ ఇషాన్ కిషన్ (1) నిరాశపరిచినా, శ్రేయస్ అయ్యర్ అద్భుతమైన ఆటతీరుతో ఆకట్టుకున్నాడు. బాధ్యతాయుతంగా ఆడిన అయ్యర్.. 71 బంతుల్లో 5 ఫోర్లు, 2 సిక్సర్లతో 66 పరుగులు సాధించి అత్యధిక స్కోరర్గా నిలిచాడు.
భారత ఇన్నింగ్స్ మధ్యలో వికెట్లు వరుసగా పడటంతో స్కోరు బోర్డు వేగం తగ్గింది. వాషింగ్టన్ సుందర్ (2), అక్షర్ పటేల్ (1), శివమ్ దూబే (0) స్వల్ప వ్యవధిలోనే వెనుదిరిగారు. చివర్లో జస్ప్రీత్ బుమ్రా విలువైన పరుగులు జోడించాడు. కేవలం 13 బంతుల్లో 3 ఫోర్లు, ఒక సిక్సర్తో అజేయంగా 20 పరుగులు చేసి జట్టుకు గౌరవప్రదమైన స్కోరును అందించాడు. ప్రసిద్ధ్ కృష్ణ డకౌట్ కావడంతో భారత్ ఇన్నింగ్స్ ముగిసింది.
ఇంగ్లాండ్ బౌలర్లలో జోఫ్రా ఆర్చర్ 47 పరుగులిచ్చి 3 వికెట్లు పడగొట్టగా, గస్ అట్కిన్సన్ కూడా 3 వికెట్లతో చెలరేగాడు. సకిబ్ మహమూద్కు రెండు వికెట్లు దక్కాయి. పిచ్ బ్యాటింగ్కు అంత సులువుగా లేకపోవడంతో, టీమిండియా కట్టుదిట్టంగా బౌలింగ్ చేస్తే ఈ స్కోరును కాపాడుకుని సిరీస్లో మరో విజయాన్ని అందుకోవచ్చు.
