మెడికల్ కాలేజీల అనుమతుల్లో గోల్‌మాల్

కలం డెస్క్ : మెడికల్ కాలేజీల (Medical Colleges) అనుమతుల గోల్‌మాల్ విషయంలో ఈడీ (ED) రంగంలోకి దిగింది. పర్మిషన్లతో పాటు తనిఖీల సమాచారాన్ని ముందుగానే తెలుసుకోవడం, నకిలీ ఫేకల్టీలతో అనుమతులు తెచ్చుకోవడం.. ఇలాంటి అంశాలపై అందిన ఫిర్యాదుతో గతంలోనే (జూన్ 30న) సీబీఐ ఎఫ్ఐఆర్ నమోదు చేసింది. భారీ స్థాయిలో లంచాలు ఎర వేసినట్లు, అధికారులు పుచ్చుకున్నట్లు నిర్ధారణ కావడంతో ఆర్థిక వ్యవహారాల్లో జరిగిన అవకతవకలపై ఈడీ(ED) సోదాలు ప్రారంభించింది. ఏకకాలంలో హైదరాబాద్, విశాఖపట్నం, ఇండోర్, నవ రాయ్2పూర్, ఢిల్లీ, గురుగ్రామ్, పాట్నా, కాన్పూర్, మీరట్, వారణాసి, అహ్మదాబాద్, గాంధీనగర్, ఉదయపూర్ తదితర 15 నగరాల్లో ఈడీ బృందాలు సోదాలు నిర్వహిస్తున్నాయి.

డాక్టర్ అంకం రాంబాబు, డా. హరిప్రసాద్… :

మెడికల్ కాలేజీలకు నేషనల్ మెడికల్ కౌన్సిల్ నుంచి జారీ అయ్యే అనుమతులు, నిబంధనలకు అనుగుణంగా సౌకర్యాలు ఉన్నాయో లేవో జరిగే తనిఖీల విషయంలో కేంద్ర వైద్యారోగ్య మంత్రిత్వశాఖ అధికారులకు పలు కళాశాలల యాజమాన్యం మధ్యవర్తుల ద్వారా లంచాలు ముట్టచెప్పిందంటూ సీబీఐ ఎఫ్ఐఆర్ నమోదు చేసింది. హైదరాబాద్‌లోని శ్రీనగర్ కాలనీలో నివాసం ఉంటున్న డాక్టర్ అంకం రాంబాబు, అనంతపురం జిల్లా కదిరి ప్రాంతానికి చెందిన డాక్టర్ హరిప్రసాద్, విశాఖపట్నంలోని అక్కయ్యపాలెంలో నివాసం ఉంటున్న డాక్టర్ కృష్ణ కిషోర్, విశాఖపట్నంలోని గాయత్రి మెడికల్ కాలేజీ డైరెక్టర్ వెంకట్, వరంగల్‌లోని ఫాదర్ కొలంబో ఇన్‌స్టిట్యూట్ ఆఫ్ మెడికర్ సైన్సెస్ నిర్వాహకుల్లో ఒకరైన ఫాదర్ కొమ్మారెడ్డి జోసెఫ్ తదితరులను నిందితులుగా సీబీఐ తన ఎఫ్ఐఆర్‌లో పేర్కొన్నది.

లంచాల వ్యవహారం జరిగిందిలా.. :

సీబీఐ(CBI) తన ఎఫ్ఐఆర్‌లో పేర్కొన్న ప్రకారం… గురుగ్రామ్‌కు చెందిన వీరేంద్రకుమార్ తనకు సన్నిహితంగా ఉన్న అనంతపురం జిల్లా కదిరి ప్రాంతానికి చెందిన డాక్టర్ హరిప్రసాద్, అతని ద్వారా హైదరాబాద్ శ్రీనగర్ కాలనీకి చెందిన డాక్టర్ అంకం రాంబాబు, విశాఖపట్నం నగరానికి చెందిన డాక్టర్ కృష్ణ కిషోర్ తదితరుల ద్వారా దక్షిణాది రాష్ట్రాల్లోని మెడికల్ కాలేజీలకు అవసరమైన అనుమతులు, తనిఖీలు జరిపే సమాచారాన్ని కేంద్ర వైద్యారోగ్య మంత్రిత్వశాఖ ద్వారా ముందుగానే తెలుసుకోవడం, నేషనల్ మెడికల్ కౌన్సిల్ నుంచి కూడా ముందస్తు సమాచారాన్ని సేకరించడం.. ఇలాంటివి జరిగేవని సీబీఐ పేర్కొన్నది. డాక్టర్ హరి ప్రసాద్ తనకు తానుగా కన్సల్టెంట్‌గా పరిచయం చేసుకుని వైద్యారోగ్య మంత్రిత్వశాఖ, నేషనల్ మెడికల్ కౌన్సిల్ అధికారులు, సిబ్బందితో కుమ్మక్కై వారికి లంచాలు ఇచ్చి అంతర్గత సమాచారాన్ని, నోట్ ఫైల్స్ కాపీలను వాట్సాప్ ద్వారా తీసుకున్నట్లు సీబీఐ పేర్కొన్నది. హవాలా ఛానెళ్ళ ద్వారా వీరేంద్ర కుమార్ చొరవతో అధికారులకు, సిబ్బందికి చేరాయని ఆరోపించింది.

లక్షలాది రూపాయల ముడుపులు :

విశాఖలోని గాయత్రి మెడికల్ కాలేజీ డైరెక్టర్ వెంకట్ నుంచి రూ. 50 లక్షలు తీసుకున్న డాక్టర్ హరి ప్రసాద్.. నేషనల్ మెడికల్ కౌన్సిల్ దగ్గర అనుమతి విషయమై పెండింగ్‌లో ఉన్న వ్యవహారాన్ని చక్కదిద్దనున్నట్లు నమ్మించి కొంత మొత్తాన్ని వీరేంద్ర కుమార్ ద్వారా హవాలా మార్గంలో చేరవేసినట్లు సీబీఐ పేర్కొన్నది. వరంగల్‌లోని ఫాదర్ కొలంబో ఇన్‌స్టిట్యూట్ ఆఫ్ మెడికల్ సైన్సెస్ వ్యవహారంలో ఫాదర్ కొమ్మారెడ్డి జోసెఫ్ నుంచి డాక్టర్ హరిప్రసాద్ రెండుసార్లు రూ. 20 లక్షలు, రూ. 46 లక్షల చొప్పున తీసుకుని బ్యాంకు లావాదేవీల రూపంలోనే మధ్యవర్తులకు చెల్లించినట్లు నిర్ధారణ అయినట్లు సీబీఐ వివరించింది. అనుమతులు ఇవ్వడంలో, తనిఖీలు నిర్వహించడంలో కే,ధ్ర వైద్యారోగ్య మంత్రిత్వశాఖలోని అంతర్గత ఫైల్స్, ఎన్ఎంసీలోని సర్క్యులర్‌ల వివరాలను ఇమేజ్‌ల రూపంలో వాట్సాప్ ద్వారా ముందుగానే చేరవేసి అధికార దుర్వినియోగానికి సిబ్బంది పాల్పడినట్లు తేలింది. ఎన్ఎంసీ తనిఖీల సందర్భంగా బోకస్ ఫేకల్టీని సమకూర్చి రెన్యూవల్స్ మంజూరు చేయడం, అనుమతులు ఇవ్వడం తదితరాలను డాక్టర్ హరిప్రసాద్ నిర్వహించినట్లు తేలింది. అధికారులు, సిబ్బంది సైతం లంచాలు తీసుకున్న తర్వాత ఇలాంటి చట్టవిరుద్ధ కార్యకలాపాలకు పాల్పడ్డారని తేల్చింది.

Read Also: కలిసి నడుద్దాం… హక్కుల్ని సాధించుకుందాం…

Follow Us on : Pinterest