కలం, స్పోర్ట్స్: కామన్వెల్త్ గేమ్స్ (Commonwealth Games) 2026లో ఏడో రోజు భారత్కు కీలకంగా మారింది. బాక్సింగ్, వెయిట్లిఫ్టింగ్, అథ్లెటిక్స్, స్విమ్మింగ్, లాన్ బౌల్స్, పారా స్పోర్ట్స్లో భారత స్టార్ క్రీడాకారులు బరిలోకి దిగనున్నారు. పతకాల సంఖ్య పెంచుకోవడమే టీమిండియా లక్ష్యంగా ఉంది.
సంజనపై ఆశలు
భారత్ తరఫున సంజన మహిళల 77 కేజీల ఫైనల్లో పోటీ పడనుంది. ఇటీవల వెయిట్లిఫ్టింగ్లో భారత్ మంచి ఫలితాలు సాధించింది. అదే జోరును కొనసాగించాలని జట్టు భావిస్తోంది.
అథ్లెటిక్స్లో పలు పతకాలపై గురి
పురుషుల లాంగ్ జంప్ ఫైనల్లో శ్రీశంకర్ మురళి, లోకేష్ సత్యనాథన్ బరిలోకి దిగనున్నారు. మహిళల 3000 మీటర్ల స్టీపుల్చేజ్ ఫైనల్లో పారుల్ చౌదరి పోటీ పడనుంది. మహిళల షాట్పుట్ ఫైనల్లో మన్ప్రీత్ కౌర్ తన అదృష్టాన్ని పరీక్షించుకోనుంది. పారా అథ్లెటిక్స్లో డిస్కస్ త్రో ఫైనల్లో దేవేందర్ కుమార్, సాగర్ థయత్ పోటీ పడనున్నారు.
బాక్సింగ్లో బిజీ షెడ్యూల్
బాక్సింగ్లో భారత్కు అత్యంత బిజీ రోజు కానుంది. ఐదుగురు భారత బాక్సర్లు సెమీఫైనల్ బెర్త్ కోసం బరిలోకి దిగనున్నారు. సెమీస్ చేరితే కనీసం పతకం ఖాయమవుతుంది. మహిళల 51 కేజీల క్వార్టర్ ఫైనల్లో సాక్షి చౌదరి పోటీ పడనుంది. మహిళల 70 కేజీలలో అరుంధతి చౌదరి రింగ్లోకి దిగనుంది.
పురుషుల 60 కేజీలలో సచిన్ సివాచ్ బోట్స్వానాకు చెందిన ట్రెజర్ మోరెమితో తలపడనున్నాడు. 80 కేజీలలో అంకుష్ యాదవ్, 90 ప్లస్ కేజీలలో నరేందర్ బెర్వాల్ తమ క్వార్టర్ ఫైనల్స్ ఆడనున్నారు. రోజు చివర్లో మహిళల 57 కేజీల క్వార్టర్ ఫైనల్లో జైస్మిన్ లాంబోరియా ఇంగ్లండ్కు చెందిన ఎలిస్ గ్లిన్తో తలపడనుంది.
స్విమ్మింగ్లో ఫైనల్ లక్ష్యం
పురుషుల 200 మీటర్ల ఫ్రీస్టైల్ హీట్స్లో సాజన్ ప్రకాశ్, అనీష్ ఎస్ గౌడ బరిలోకి దిగనున్నారు. అర్హత సాధిస్తే రాత్రి ఫైనల్లో పోటీ పడతారు. ఆర్యన్ నెహ్రా నేరుగా పురుషుల 1500 మీటర్ల ఫ్రీస్టైల్ ఫైనల్లో పాల్గొంటాడు. పారా స్విమ్మింగ్లో సుయశ్ నారాయణ్ జాదవ్, చైతన్య విశ్వాస్ కులకర్ణి 50 మీటర్ల ఫ్రీస్టైల్ ఎస్7 హీట్స్లో పోటీ పడనున్నారు. అర్హత సాధిస్తే ఫైనల్లో కూడా బరిలోకి దిగుతారు.
లాన్ బౌల్స్లో మరో సవాల్
పురుషుల జోడీ విభాగంలో దినేశ్ కుమార్, నవనీత్ సింగ్ నమీబియాతో తలపడనున్నారు. మహిళల సింగిల్స్లో నయనమోని సైకియా, ఐల్ ఆఫ్ మ్యాన్కు చెందిన కరోలిన్ వైట్హెడ్తో ఆడనుంది. ఏడో రోజు భారత్కు అత్యంత కీలకం కానుంది. వెయిట్లిఫ్టింగ్, అథ్లెటిక్స్, బాక్సింగ్, స్విమ్మింగ్, పారా స్పోర్ట్స్లో పతకాల అవకాశాలు ఉన్నాయి. ఈ పోటీల్లో భారత క్రీడాకారుల ప్రదర్శనపై అభిమానుల దృష్టి నిలవనుంది.
