కలం, వెబ్ డెస్క్ : క్రిస్టియానో రొనాల్డో(Cristiano Ronaldo) మరోసారి తన సత్తా చాటారు. తన అద్భుత ప్రదర్శనతో అల్-నస్సర్(Al-Nassr) జట్టుకు కీలక విజయాన్ని అందించారు. డమాక్ జట్టుతో జరిగిన 2025-26 సీజన్ చివరి లీగ్ మ్యాచ్లో అల్-నస్సర్ విజయం సాధించి సౌదీ ప్రో లీగ్ ఛాంపియన్గా నిలిచింది. ఈ విజయంతో అల్-నస్సర్ క్లబ్ తన 11వ లీగ్ టైటిల్ను సొంతం చేసుకుంది. 2023లో క్లబ్లో చేరిన తర్వాత రొనాల్డోకు ఇది తొలి ప్రధాన ట్రోఫీగా నిలిచింది.
నిజానికి ఈ మ్యాచ్కు ముందు అల్-నస్సర్ జట్టుపై చాలా ఒత్తిడి ఉంది. అంతకుముందు జరిగిన మ్యాచ్లో అల్-హిలాల్తో 1-1తో డ్రా చేసుకోవడంతో, టైటిల్ నెగ్గాలంటే డమాక్పై కచ్చితంగా గెలవాల్సిన పరిస్థితి ఏర్పడింది. ఈ కీలక పోరులో అల్-నస్సర్ ఆటగాళ్లు అద్భుతంగా రాణించారు. మొదట సాడియో మానే హెడర్ ద్వారా గోల్ చేసి జట్టుకు ఆధిక్యం అందించగా, 51వ నిమిషంలో కింగ్స్లీ కోమన్ రెండో గోల్ కొట్టారు. ఆ తర్వాత డమాక్ ఆటగాడు మోర్లే సిల్లా పెనాల్టీ ద్వారా ఒక గోల్ చేసి ఆధిక్యాన్ని తగ్గించారు.
మ్యాచ్ 60వ నిమిషంలో జోనో ఫెలిక్స్ను ఫౌల్ చేయడంతో అల్-నస్సర్కు ఒక ఫ్రీ-కిక్ లభించింది. దీనిని రొనాల్డో ఎంతో చాకచక్యంగా గోల్గా మలిచారు. ఇది ఆయన కెరీర్లో 972వ గోల్ కాగా, 65వ ఫ్రీ-కిక్ గోల్ కావడం విశేషం. ఆ తర్వాత 80వ నిమిషంలో రొనాల్డో మరో గోల్ చేయడంతో అల్-నస్సర్ 4-1తో ఘన విజయం సాధించింది. ఈ సీజన్లో సౌదీ ప్రో లీగ్లో అత్యధిక గోల్స్ చేసిన వారిలో రొనాల్డో మూడో స్థానంలో నిలిచారు.
రొనాల్డో ఈ క్లబ్లో చేరినప్పటి నుంచి అల్-నస్సర్ జట్టు పలుమార్లు రన్నరప్గానే మిగిలిపోయింది. ఇటీవలే ఏఎఫ్సీ ఛాంపియన్స్ లీగ్ టూ ఫైనల్ లో జపాన్ క్లబ్ గంబా ఒసాకా చేతిలో 1-0తో ఓడిపోయింది. దీంతో మ్యాచ్ ముగిశాక బెంచ్పై కూర్చున్న 41 ఏళ్ల రొనాల్డో కాస్త భావోద్వేగానికి లోనయ్యారు. 2021లో యువెంతుస్ క్లబ్తో కొప్పా ఇటాలియా గెలిచిన తర్వాత, క్లబ్ స్థాయిలో ఆయనకు దక్కిన మొదటి పెద్ద ట్రోఫీ ఇదే. ఈ విజయంతో తాను ఆడిన ప్రతి దేశంలోనూ (పోర్చుగల్, ఇంగ్లాండ్, స్పెయిన్, ఇటలీ, సౌదీ అరేబియా) లీగ్ టైటిల్ గెలిచిన రికార్డును రొనాల్డో సొంతం చేసుకున్నారు.
