కలం, స్పోర్ట్స్: చదరంగంలో (Chess) మరో సంచలన జరిగింది. 12 ఏళ్లకే ఫైడ్ మాస్టర్గా నిలిచి బుడతడు ఇప్పుడు గ్రాండ్ మాస్టర్ టైటిల్పై తన గురినిలిపాడు. అతడే ఆరవ్ సర్బాలియా (Aarav Sarbalia). ఈ బుడ్డోడు చదరంగం బోర్డు మీద ఎత్తుగడలు వేయడమే కాదు, సోషల్ మీడియాలో క్రేజీ రీల్స్తో కూడా అందరినీ ఆకట్టుకుంటున్నాడు. ఇప్పుడు చెస్ ప్రపంచంలో హాట్ టాపిక్గా మారాడు. ఇటీవల జరిగిన ఫైడ్ కాండిడేట్స్ టోర్నమెంట్లో సూపర్ గ్రాండ్ మాస్టర్ల ఎత్తుగడలను ముందే ఊహించి వ్యాఖ్యాతలను సైతం ఆరవ్ ఆశ్చర్యపరిచాడు. కేవలం 12 ఏళ్ల వయసులోనే ఫైడ్ మాస్టర్ (FM) హోదా పొందిన ఈ చిన్నారి, ఇప్పుడు అంతర్జాతీయ స్థాయిలో అందరి దృష్టిని ఆకర్షిస్తున్నాడు.
ఆరవ్ కుటుంబం 2020లో ఢిల్లీ నుండి బెంగళూరుకు మారింది. కోవిడ్ సమయంలో సమయాన్ని సద్వినియోగం చేసుకోవడానికి ఆరవ్ తండ్రి యతిన్ సర్బాలియా తన కొడుకును చెస్ క్లాసుల్లో చేర్పించారు. లెజెండరీ కోచ్ ఆర్.బి. రమేష్ ఆధ్వర్యంలోని చెస్ గురుకుల్లో ఆరవ్ శిక్షణ ప్రారంభమైంది. ఆరవ్ నేర్చుకుంటున్నప్పుడు అతని తండ్రి కూడా పక్కనే ఉండి ఆటలోని మెళకువలను గమనించేవారు.
ఆరవ్ (Aarav Sarbalia) ఆటలో రాణిస్తున్నా, విదేశాల్లో టోర్నమెంట్లు ఆడటానికి అయ్యే భారీ ఖర్చును భరించడం కుటుంబానికి కష్టంగా మారింది. స్పాన్సర్షిప్ కోసం ప్రయత్నించినప్పుడు, సోషల్ మీడియాలో ఆరవ్కు ఎంత మంది ఫాలోవర్లు ఉన్నారని కంపెనీలు అడగడం మొదలుపెట్టాయి. దీంతో ఆరవ్ తల్లిదండ్రులు అతని పేరుతో ఫన్నీ రీల్స్ చేయడం ప్రారంభించారు. ప్రస్తుతం హంగేరియన్ లెజెండ్ జుడిత్ పోల్గర్ వంటి ప్రముఖులు కూడా ఆరవ్ను ఫాలో అవుతుండటం విశేషం.
సోషల్ మీడియాలో పాపులర్ అయినప్పటికీ, ఆరవ్కు సొంతంగా ఫోన్ లేదు. నెలకు కేవలం రెండు మూడు గంటలు మాత్రమే దీని కోసం కేటాయిస్తారు. మిగతా సమయమంతా చదరంగం సాధనకే ప్రాధాన్యత ఇస్తారు. ఈ క్రేజ్ వల్ల ఒక స్టార్టప్ కంపెనీ ఆరవ్కు స్పాన్సర్షిప్ ఇవ్వడానికి ముందుకు వచ్చింది. ఇది అతని విదేశీ పర్యటనలకు ఎంతో ఊరటనిస్తోంది.
ప్రస్తుతం ఆరవ్ ఆరుసార్లు నేషనల్ ఛాంపియన్ అయిన సూర్య శేఖర్ గంగూలీ వద్ద శిక్షణ పొందుతున్నాడు. ఇంటర్నేషనల్ మాస్టర్ (IM) వంటి చిన్న చిన్న లక్ష్యాల కంటే, నేరుగా గ్రాండ్ మాస్టర్ (GM) టైటిల్ సాధించడమే ధ్యేయంగా ముందుకు సాగుతున్నాడు. త్వరలో జర్మనీలో జరగనున్న జీఎం కేటగిరీ టోర్నమెంట్లో పాల్గొనేందుకు ఆరవ్ సిద్ధమవుతున్నాడు.
Read Also: ఆమ్ ఆద్మీ పార్టీలో తిరుగుబాటు.. బీజేపీలోకి ముగ్గురు రాజ్యసభ సభ్యులు
Follow Us On: Sharechat
