జూబ్లీహిల్స్ ఎన్నికల్లో ఘన విజయం సాధించడంతో కాంగ్రెస్ పార్టీలో జోష్ కనిపిస్తోంది. పార్టీ నేతలు, కార్యకర్తలు సమన్వయంతో పనిచేయడంతో ఇక్కడ విజయం సాధించగలిగామని కాంగ్రెస్ నేతలు చెబుతున్నారు. విబేధాలు పక్కనపెట్టి సీనియర్ నేతలు గెలుపుకోసం శ్రమించారు. ఇక రేవంత్ రెడ్డి(Revanth Reddy) పకడ్బందీగా వ్యూహం రచించి కాంగ్రెస్ పార్టీని విజయతీరాల వైపు నడిపించారు. బీఆర్ఎస్ పార్టీ ఎంత ప్రచారం చేసినా.. ప్రభుత్వం మీద కొంత వ్యతిరేకత ఉన్నా హస్తం ఈ నియోజకవర్గంలో నిలదొక్కుకోగలిగింది. అయితే ఇదే ఊపులో పంచాయతీ ఎన్నికల్లోనూ(Local Body Polls) విజయం సాధించాలని, మెజార్టీ స్థానాలను గెలుచుకోవాలని కాంగ్రెస్ భావిస్తోంది. అందుకే వచ్చే నెలలో ఎన్నికలు పూర్తి చేయాలని భావిస్తోంది. పార్టీ పరంగా బీసీలకు 42 శాతం రిజర్వేషన్లు ఇవ్వాలని కాంగ్రెస్ ప్రకటించింది. అయితే జూబ్లీహిల్స్ లో గెలిచినట్టే పంచాయతీ ఎన్నికల్లోనూ గెలవగలదా? గ్రామాల్లో అటువంటి పరిస్థితి ఉందా? రైతులు కాంగ్రెస్ ప్రభుత్వం పట్ల సంతృప్తిగానే ఉన్నారా? అన్నది వేచి చూడాలి.
గ్రామాల్లో సవాళ్లు
గ్రామీణ ప్రాంతాల్లో మెజార్టీ ఓటర్లు రైతులు, రైతు కూలీలు, కౌలు రైతులే. కాంగ్రెస్ పార్టీ రుణమాఫీ మాటను నిలబెట్టుకున్నది. అయితే పూర్తిస్థాయిలో అందరికీ రుణమాఫీ కాలేదన్న విమర్శ ఉంది. దీనికితోడు రైతు బంధు సకాలంలో అమలు చేయడం లేదన్న అసంతృప్తి రైతుల్లో ఉంది. ఇక కౌలు రైతులకు ఇస్తామన్న డబ్బులు ఇవ్వలేదు. మహిళలకు నెలనెలకు 2500 ఇస్తామన్న హామీ నెరవేరలేదు. కల్యాణ లక్ష్మిలో తులం బంగారం ఇవ్వలేమని ఇప్పటికే కాంగ్రెస్ నేతలు చేతులెత్తేశారు. ఈ అంశాలన్నీ పంచాయతీ ఎన్నికల్లో ప్రభావం చూపించే అవకాశం ఉంది. అయితే కాంగ్రెస్ పార్టీ ప్రస్తుతం అధికారంలో ఉంది. ఒక వేళ అధికారపార్టీకి ఓటు వేయకపోతే ప్రస్తుతం వస్తున్న పథకాలు బంద్ అవుతాయేమోనని ఓటర్లు భయపడే అవకాశం ఉంది. గతంలోనూ అధికారంలో ఉన్న పార్టీలో పంచాయతీలు, ఎంపీటీసీలు, జెడ్పీటీసీలు గెలచుకున్నాయి. కాబట్టి కాంగ్రెస్ పార్టీకి ఇవి అనుకూల అంశాలుగా మారతాయి.
అభ్యర్థే కీలకం
పంచాయతీ ఎన్నికలు(Local Body Polls) పార్టీ గుర్తుల మీద జరగవు. ఆయా పార్టీలు మద్దతు ఇచ్చినప్పటికీ స్వతంత్ర అభ్యర్థులుగానే నేతలు పోటీ చేస్తారు. అయితే పంచాయతీ ఎన్నికల్లో పార్టీల బలాబలాల‌లో పాటు అభ్యర్థి ఎంపిక కూడా కీలకం. ఒక్కోసారి ఏ పార్టీకి చెందిన వ్యక్తి అని కాకుండా .. అభ్యర్థికి ఉన్న మంచితనం ఆధారంగా గెలిచే అవకాశం ఉంటుంది. ఇక పంచాయతీ ఎన్నికల్లో డబ్బు, మద్యం ప్రభావం కూడా విపరీతంగా ఉంటుంది. భారీగా డబ్బులు ఖర్చుపెట్టే నేతలు గెలుస్తుంటారు. కాబట్టి అభ్యర్థి ఎంపిక ఎంతో కీలకం.
మంత్రులు, ఎమ్మెల్యేలు, ఎమ్మెల్సీలపై బాధ్యత
ఇక పంచాయతీ ఎన్నికల్లో మంత్రులు, ఎమ్మెల్యేలు, ఎమ్మెల్సీలు అత్యంత కీలకం. వారి వారి నియోజకవర్గాల్లో అభ్యర్థులను గెలుపించుకోవాల్సిన బాధ్యత వారి మీద ఉంటుంది. కానీ ప్రభుత్వం మీద ఫీల్ గుడ్ భావన ఉంటే కాంగ్రెస్ గెలుపు ఈజీయే.. కానీ గ్రామీణ ప్రాంతాల్లో ప్రభుత్వం మీద కొంత వ్యతిరేకత కనిపిస్తోంది. ఈ నేపథ్యంలో ప్రభుత్వ వ్యతిరేకత ప్రభావం నుంచి కాంగ్రెస్ ఎలా బయటపడుతుందో వేచి చూడాలి. ఇక తెలంగాణ రాష్ట్రంలోని గ్రామీణ ప్రాంతాల్లో బీజేపీకి పెద్దగా సంస్థాగతంగా బలం లేదు. అయితే బీఆర్ఎస్ కు గ్రామీణ ప్రాంతాల్లో గట్టి పట్టు ఉంది. ఈ నేపథ్యంలో బీఆర్ఎస్, కాంగ్రెస్ మధ్యే హోరాహోరీ పోరు సాగే అవకాశం ఉంది. జూబ్లీహిల్స్ ఉప ఎన్నికలో విజయం సాధించడం ద్వారా రేవంత్ రెడ్డి పార్టీ మీద పట్టు సాధించగలిగారు. మరి పంచాయతీ ఎన్నికల్లోనూ కాంగ్రెస్ పార్టీ తన మద్దతుదారులను గెలిపించుకుంటే రేవంత్ మరింత స్ట్రాంగ్ అవుతారు. మరి ఆయన ఎటువంటి వ్యూహం రచిస్తారో వేచి చూడాలి.
Read Also: ఉగ్రవాదిని చితకబాదిన తోటి ఖైదీలు
Follow Us on : Pinterest
