కలం, వెబ్డెస్క్: సాఫ్ట్వేర్ ఉద్యోగులను లేఆఫ్ వెంటాడుతోంది. టెక్ దిగ్గజాలు ఒకదాని తర్వాత ఒకటి ఉద్యోగస్తులను సాగనంపుతున్నాయి. ఇటీవల భారతీయ టెక్ జెయింట్ టీసీఎస్ గత మూడు నెలల కాలానికి దాదాపు 12వేల మందిని తొలగించింది. అంతకుముందు దాదాపు 80వేల మందిని ఇంటికి పంపింది. ఇప్పుడు అదే బాటలో అమెజాన్ వేల మందిని తొలగించనుంది (Amazon layoffs). ఈ మేరకు జనవరి 27న 14వేల మందిని తొలగించేందుకు ప్రణాళకలు సిద్ధం చేసినట్లు తెలుస్తోంది.
ఉద్యోగుల తగ్గింపులో మొత్తం 30 వేల మందికి లేఆఫ్ ఇవ్వనున్నట్లు గతంలోనే ప్రకటించిన అమెజాన్.. మొదటి దశలో నిరుడు అక్టోబర్లో 14వేల మందిని తొలగించింది. ఇప్పుడూ అంతే సంఖ్యలో సాగనంపనుంది. కాగా, 2022, 2023లో 27వేల మందికి అమెజాన్ లేఆఫ్ ఇచ్చింది. కంపెనీ మొత్తం ఉద్యోగుల సంఖ్య 1.58 మిలియన్లు కాగా.. రెండో దశ తొలగింపుతో 10శాతం కోత పడనుంది.
ఎవరిపై ప్రభావం?
అమెజాన్ వెబ్ సర్వీస్(AWS), రిటైల్ సెక్టార్, ప్రైమ్ వీడియో, హెచ్ఆర్ రంగాలపై లేఆఫ్ ప్రభావం ఎక్కువగా ఉండనుంది. కాగా, నిరుడు తొలగించినవాళ్లకు వేతనంతో మూడు నెలల సమయం ఇచ్చారు. వేరే ఉద్యోగం వెతుక్కునేందుకు ఈ అవకాశం కల్పించారు.
ఎందుకీ కోతలు?
ఏఐ ప్రభావం, ప్రాజెక్టులు లేకపోవడం, ఫెర్మార్సెన్స్ తగ్గడం సాకుగా అమెజాన్ చెబుతోంది. అయితే, ఆర్టిఫిషియల్ ఇంటెలిజెన్స్(ఏఐ) కారణంగానే ఎక్కువ మంది తొలగింపునకు గురవుతున్నారు. నిరుడు కంపెనీ అంతర్గత లేఖలో ఇదే విషయాన్ని ప్రస్తావించింది. ‘ఇంటర్నెట్ జమానాలో అత్యంత విప్లవాత్మక టెక్నాలజీ ఏఐ. కంపెనీలు కొత్త కొత్త ఆవిష్కరణలు వేగంగా చేయడానికి ఇది ఉపయోగపడుతోంది’ అని ఆ లెటర్లో అమెజాన్ పేర్కొంది.
అమెజాన్ సీఈవో ఆండీ జెస్సీ మాత్రం లేఆఫ్స్కు ఆర్థిక భారం, ఏఐ కారణం కాదంటున్నారు. కంపెనీల్లో పాతుకుపోయిన ‘బ్యూరోక్రసీ’, అధిక అంచెల(లేయర్స్) విధానం వల్లే ఇది జరుగుతోందని చెబుతున్నారు. అయితే, 2025లో తొలగింపుల సందర్భంగా లేఆఫ్స్కు ఏఐ కారణమని ఆయన పేర్కొనడం గమనార్హం.
