కలం, వెబ్ డెస్క్ : విశాఖపట్నం తీరంలో చేపల వేటకు వెళ్లిన మత్స్యకారులకు (Visakhapatnam Fishermen) సముద్రంలో పెను ప్రమాదం తృటిలో తప్పింది. సాధారణ రోజువారీ వేటలో భాగంగా సముద్రంలోకి వెళ్లిన బోటు ఇంజిన్‌లో ఉన్నట్లుండి సాంకేతిక లోపం తలెత్తి మోటారు ఆగిపోయింది. అదే సమయంలో అలల ఉధృతి తీవ్రంగా ఉండటంతో బోటును నిలిపేందుకు వేసిన లంగరు తెగిపోయింది. దాంతో సముద్రపు బలమైన అలల ప్రవాహానికి బోటు కొట్టుకుంటూ రుషికొండ తీరానికి సమీపంలోకి వచ్చి ఒక ప్రాంతంలో నిలిచిపోయింది.
ఘటనపై సమాచారం అందుకున్న వెంటనే మెరైన్ పోలీసులు, స్థానిక అధికారులు సహాయక చర్యలు చేపట్టారు. ప్రమాద సమయంలో బోటులో ఉన్న ఆరుగురు మత్స్యకారులు ఏ విధమైన ప్రమాదానికి గురికాకుండా క్షేమంగా ఒడ్డుకు చేరుకున్నారు. ప్రమాదం తప్పడంతో వారి కుటుంబ సభ్యులతో పాటు అధికారులు కూడా ఊపిరి పీల్చుకున్నారు. అనంతరం సాంకేతిక లోపానికి గురైన బోటును సురక్షితంగా తీరానికి చేర్చేందుకు చర్యలు చేపట్టారు.
