క‌లం, వెబ్‌డెస్క్‌: ఇజ్రాయెల్ పార్లమెంటు ఎన్నికల (Israel Elections) ఫలితాలపై ఉత్కంఠ కొనసాగుతోంది. మంగళవారం జరిగిన ఎన్నికలకు సంబంధించి గురువారం ఉదయం నాటికి దాదాపు 94 శాతం ఓట్ల లెక్కింపు పూర్తయింది. అయినప్పటికీ, ఏ కూటమికి స్పష్టమైన మెజారిటీ వచ్చే పరిస్థితి కనిపించడం లేదు. ప్రధాని బెంజమిన్ నెతన్యాహు (Benjamin Netanyahu) నేతృత్వంలోని లికుడ్ పార్టీకి 26 సీట్లు, ఆయన ప్రధాన ప్రత్యర్థి గాడి ఐసెన్‌కాట్ నేతృత్వంలోని యషార్ పార్టీకి 21 సీట్లు వస్తాయని ప్రాథమిక ఫలితాలు సూచిస్తున్నాయి. నెతన్యాహు కూటమికి 53, ఐసెన్‌కాట్ కూటమికి 48 సీట్లు వచ్చే అవకాశం ఉందని అంచనాలు వెలువడ్డాయి. ప్రభుత్వ ఏర్పాటుకు అవసరమైన 61 సీట్ల మెజారిటీని ఏ కూటమి సాధించే పరిస్థితి లేకపోవడంతో అరబ్ పార్టీల మద్దతు కీలకంగా మారే అవకాశం ఉంది. తుది ఫలితాలను నవంబర్ 4న ప్రకటించనున్నారు.
ఆధారాలు లేకున్నా ఆరోప‌ణ‌లు
ఎన్నికల్లో అరబ్ పార్టీలు అక్రమాలకు పాల్పడ్డాయని నెతన్యాహు ఆరోపించారు. తమ లికుడ్ పార్టీ ఎన్నికల అక్రమాలకు సంబంధించిన ఆధారాలను సేకరించి, ఎన్నికల అధికారులు, దర్యాప్తు సంస్థలు, భద్రతా విభాగాలకు అందించిందని ఆయన పేర్కొన్నారు. మరోవైపు, అరబ్ పార్టీలకు విదేశీ శక్తులు ఆర్థిక సహాయం అందించడం ద్వారా ఎన్నికల్లో జోక్యం చేసుకున్నాయని లికుడ్ పార్టీ ఆరోపించింది. అయితే, ఈ ఆరోపణలకు సంబంధించి ఎలాంటి ఆధారాలను వెల్లడించలేదు. ఎన్నికలు స్వేచ్ఛగా, నిష్పక్షపాతంగా జరిగాయని ప్రతిపక్ష నేతలు పేర్కొంటూ, అక్రమాలు జరిగినట్లు ఆధారాలు లేవని స్పష్టం చేశారు. ఎన్నికల అక్రమాలకు సంబంధించి విశ్వసనీయమైన ఫిర్యాదులు వస్తే విచారణ చేపడతామని ఇజ్రాయెల్ పోలీసులు తెలిపారు. ఓట్ల చోరీ జరిగిందన్న ఆరోపణలకు ఎలాంటి ఆధారాలు లేవని కేంద్ర ఎన్నికల కమిటీ తాత్కాలిక డైరెక్టర్ జనరల్ డీన్ లివ్నే కూడా పేర్కొన్నట్లు సమాచారం.
అరబ్ పార్టీల‌దే కీలక పాత్ర?
ఇదిలా ఉండగా నెతన్యాహు, ఐసెన్‌కాట్ ఇద్దరూ గతంలో అరబ్ పార్టీలతో కలిసి ప్రభుత్వం ఏర్పాటు చేసే అవకాశాన్ని తోసిపుచ్చారు. అయితే, ప్రస్తుత ఎన్నికల ఫలితాల నేపథ్యంలో ప్రభుత్వ ఏర్పాటుకు ఆ పార్టీల మద్దతు అవసరమయ్యే పరిస్థితి కనిపిస్తోంది. అరబ్ పార్టీల కూటమి అయిన జాయింట్ లిస్ట్, నెతన్యాహు ప్రభుత్వాన్ని గద్దె దించేందుకు ప్రతిపక్షాలతో రాజకీయ సహకారానికి సిద్ధమని ప్రకటించింది. ఈ కూటమికి 12 సీట్లు, యునైటెడ్ అరబ్ లిస్ట్‌కు ఏడు సీట్లు వచ్చే అవకాశం ఉందని ప్రాథమిక అంచనాలు వెల్లడించాయి. మరోవైపు, ఓటర్ల తీర్పును అమలు చేసేందుకు, ప్రభుత్వంలో మార్పు తీసుకురావడానికి ప్రయత్నిస్తున్నామని ఐసెన్‌కాట్ తెలిపారు. ఓట్ల లెక్కింపు పూర్తయి తుది ఫలితాలు వెలువడిన తర్వాత ఇజ్రాయెల్‌లో ప్రభుత్వ ఏర్పాటుపై స్పష్టత వచ్చే అవకాశం ఉంది.
