కలం, గోదావరిఖని: “అడుగు అడుగునా అభివృద్ధి చేయడమే లక్ష్యం.. నియోజకవర్గంలో ప్రతి ఇంటా స్వచ్ఛమైన తాగునీరు అందించేంత వరకు విశ్రమించేది లేదు” అని రామగుండం ఎమ్మెల్యే, పెద్దపల్లి జిల్లా కాంగ్రెస్ కమిటీ అధ్యక్షుడు రాజ్ ఠాకూర్ (MLA Raj Thakur ) స్పష్టం చేశారు. సోమవారం 8వ కాలనీ 19వ డివిజన్ ఇంద్రానగర్‌లో రూ. 1.90 కోట్ల వ్యయంతో నిర్మించనున్న 6 లక్షల లీటర్ల సామర్థ్యం గల వాటర్ ట్యాంక్ నిర్మాణానికి నగర మేయర్ మహంకాళి స్వామి, స్థానిక కార్పొరేటర్ మారెల్లి సుశీల రాజిరెడ్డితో కలిసి ఆయన భూమిపూజ చేశారు.
ఈ సందర్భంగా ఎమ్మెల్యే మాట్లాడుతూ.. గత పాలకుల నిర్లక్ష్యం వల్ల నియోజకవర్గం తీవ్రంగా నష్టపోయిందని, ఇప్పుడు రామగుండం కార్పొరేషన్, సింగరేణి సంస్థల భాగస్వామ్యంతో శరవేగంగా అభివృద్ధి పనులు చేపడుతున్నామని తెలిపారు. ఈ ట్యాంక్ అందుబాటులోకి వస్తే ఇంద్రానగర్‌లోని సుమారు 1,200 కుటుంబాలకు తాగునీటి ఎద్దడి శాశ్వతంగా తీరుతుందన్నారు. నియోజకవర్గంలోని అన్ని కాలనీల్లో రోడ్లు, డ్రైనేజీలు, సెంట్రల్ లైటింగ్ వ్యవస్థను పటిష్టం చేస్తున్నామని పేర్కొన్నారు. ఈ కార్యక్రమంలో కార్పొరేషన్ ప్రతినిధి ఎండీ ముస్తఫా, నాయకులు మారెల్లి రాజిరెడ్డి, దిటి బాలరాజు, లింగస్వామి, వివిధ డివిజన్ల కార్పొరేటర్లు, కాంగ్రెస్ శ్రేణులు, కాలనీ ప్రజలు పాల్గొన్నారు.
