కలం, ఖమ్మం : తెలంగాణ రాష్ట్ర రోడ్డు రవాణా సంస్థ గుర్తింపు సంఘం ఎన్నికల వేళ ఖమ్మం ఆర్టీసీ డిపో (Khammam RTC Depot) వద్ద వాతావరణం ఒక్కసారిగా వేడెక్కింది. ప్రచార పర్వంలో భాగంగా సీఐటీయూ, ఎంప్లాయీస్ యూనియన్ వర్గాల నాయకుల మధ్య మొదలైన సాధారణ వాగ్వాదం తీవ్ర ఉద్రిక్తతకు దారితీసింది. ఇరు వర్గాల కార్యకర్తలు పరస్పరం ఘర్షణకు దిగడంతో డిపో ప్రాంగణంలో తోపులాట చోటుచేసుకుంది.
ఈ క్రమంలో సీఐటీయూ (CITU) వర్గానికి చెందిన ఒక వ్యక్తి, ఎంప్లాయీస్ యూనియన్‌కు చెందిన నాయకుడిని బలంగా నెట్టివేయడంతో పరిస్థితి మరింత చేయిదాటిపోయింది. అకస్మాత్తుగా జరిగిన ఈ ఘటనతో ఆర్టీసీ ఉద్యోగులు, ప్రయాణికులు తీవ్ర ఆందోళనకు గురయ్యారు. ఉద్రిక్తత పెరిగిపోతుండటంతో సమాచారం అందుకున్న పోలీసులు వెంటనే రంగంలోకి దిగి పరిస్థితిని అదుపులోకి తెచ్చారు.
గొడవకు కారణమై, తోపులాటకు దిగిన సీఐటీయూ వ్యక్తిని పోలీసులు అదుపులోకి తీసుకుని స్టేషన్‌కు తరలించారు. ఎన్నికల వేళ డిపో వద్ద ఎలాంటి అవాంఛనీయ సంఘటనలు చోటుచేసుకోకుండా ముందస్తు చర్యగా పోలీసు బందోబస్తును ఏర్పాటు చేశారు.
Also Read : దక్షిణాఫ్రికా తమిళ మహిళకు అత్యున్నత నోబెల్ పురస్కారం!
Follow Us On: X(Twitter)
