కలం, వెబ్ డెస్క్: హైదరాబాద్లోని గోషామహల్ (Goshamahal) నియోజకవర్గంలో ఓటర్ల జాబితా సవరణ ప్రక్రియపై రాజకీయ వివాదం నెలకొంది. స్పెషల్ ఇంటెన్సివ్ రివిజన్ (SIR) సందర్భంగా ముస్లిం ఓటర్ల పేర్లను జాబితా నుంచి తొలగించేందుకు ప్రయత్నాలు జరుగుతున్నాయని ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ (Asaduddin Owaisi) ఆరోపించారు.
ప్రీ-ప్రింటెడ్ ఫారం-7లను పెద్ద సంఖ్యలో వినియోగిస్తున్నారని ఆయన పేర్కొన్నారు. గోషామహల్ పరిధిలోని కొన్ని పోలింగ్ కేంద్రాల్లో ముస్లిం ఓటర్ల పేర్లను తొలగించాలంటూ ఫారం-7 దరఖాస్తులు సమర్పించినట్లు ఒవైసీ తెలిపారు. ఒకే వ్యక్తి 122 మంది ఓటర్ల పేర్ల తొలగింపునకు సంబంధించిన దరఖాస్తులు ఎలా సమర్పించగలిగారని ఆయన ప్రశ్నించారు. వీరిలో పలువురి పేర్లు 2002 నుంచి ఓటర్ల జాబితాలో ఉన్నాయని చెప్పారు.
ఈ వ్యవహారం వెనుక బీజేపీకి చెందిన వ్యక్తులు ఉన్నారని ఒవైసీ ఆరోపించారు. అయితే బీజేపీ ఈ ఆరోపణలను ఖండిస్తూ, ఆధారాలు ఉంటే చట్టపరమైన మార్గంలో సమర్పించాలని పేర్కొంది. బల్క్గా లేదా తప్పుడు వివరాలతో ఫారం-7 దాఖలు చేసిన వారిపై చట్టపరమైన చర్యలు తీసుకోవాలని ఒవైసీ (Asaduddin Owaisi) డిమాండ్ చేశారు.
అర్హులైన ఓటర్ల పేర్లు ఎలాంటి అక్రమ ప్రక్రియ ద్వారా తొలగించకుండా ప్రతి దరఖాస్తును క్షుణ్ణంగా పరిశీలించాలని ఎన్నికల అధికారులను కోరారు. ఇదిలా ఉండగా, తప్పుడు ప్రకటనలు లేదా వివరాలతో ఫారం-7 దాఖలు చేసే వారిపై చర్యలు తీసుకోవాలని తెలంగాణ ప్రధాన ఎన్నికల అధికారి అధికారులను ఆదేశించారు. గోషామహల్లోని కొన్ని ఫారం-7 దరఖాస్తులు సంతకాలు లేకపోవడంతో పరిగణనలోకి తీసుకోలేదని ఎన్నికల అధికారులు తెలిపారు.
Also Read : ఓట్ల తొలగింపుపై ప్రశ్నిస్తే అరెస్టులా?: పొన్నం ప్రభాకర్
Follow Us On: Youtube

