కలం, కరీంనగర్ బ్యూరో: కరీంనగర్ (Karimnagar) లో నిర్వహించనున్న ‘సాంస్కృతిక ప్రదర్శన (కల్చరల్ ఎక్స్‌పో) సీజన్-2’ (Cultural Expo Season 2) కార్యక్రమానికి సంబంధించిన గోడపత్రికను కరీంనగర్ ఎమ్మెల్యే గంగుల కమలాకర్ (MLA Gangula Kamalakar) ఆవిష్కరించారు. గుల్షన్ ప్రదర్శన నిర్వాహకులు శనివారం ఎమ్మెల్యేను ఆయన క్యాంపు కార్యాలయంలో మర్యాదపూర్వకంగా కలిసి, ఆహ్వాన పత్రాన్ని అందజేశారు. ఈ వేడుకకు విచ్చేయాల్సిందిగా వారు సాదరంగా ఆహ్వానించగా.. ఎమ్మెల్యే గోడపత్రికను విడుదల చేశారు.
ఈ సందర్భంగా ఎమ్మెల్యే గంగుల కమలాకర్ మాట్లాడుతూ.. నగరంలోని మహాత్మా జ్యోతిభా పూలే మైదానంలో (సక్కర్ గ్రౌండ్) అక్టోబర్ 10, 11 తేదీల్లో రెండు రోజుల పాటు ఈ ప్రదర్శనను ఘనంగా నిర్వహించనున్నట్లు తెలిపారు. చిన్నారుల కోసం ప్రత్యేక వినోదాత్మక కార్యక్రమాలు, రకరకాల వస్తువుల విక్రయశాలలు (షాపింగ్ స్టాళ్లు), రుచికరమైన తినుబండారాల కేంద్రాలు (ఫుడ్ కోర్టులు) ఈ ప్రదర్శనలో ప్రత్యేక ఆకర్షణగా నిలవనున్నాయన్నారు.
కుటుంబ సభ్యులు, పిల్లలతో కలిసి వచ్చి సంతోషంగా గడిపేందుకు వీలుగా నిర్వాహకులు చక్కటి ఏర్పాట్లు చేస్తున్నారని, ఇలాంటి కార్యక్రమాలు పిల్లలకు వినోదంతో పాటు నూతన అనుభవాలను అందిస్తాయని పేర్కొన్నారు. కరీంనగర్ ప్రజలు పెద్ద సంఖ్యలో కుటుంబ సమేతంగా విచ్చేసి ఈ రెండు రోజుల ప్రదర్శనను విజయవంతం చేయాలని ఆయన పిలుపునిచ్చారు.
ఈ కార్యక్రమంలో ఎమ్మెల్యే గంగుల కమలాకర్‌తో పాటు నగర బీఆర్ఎస్ పార్టీ అధ్యక్షులు చల్ల హరి శంకర్, మాజీ మేయర్ సర్దార్ రవీందర్ సింగ్, కార్పొరేటర్లు యూసుఫ్, అలీ, జమ్మూ, మైనార్టీ నగర శాఖ అధ్యక్షులు మీర్ షౌకత్ అలీ, షర్ఫుద్దీన్, నాయకులు నవాజ్ హుస్సేన్, గుల్షన్ నిర్వాహకులు తదితరులు పాల్గొన్నారు.
