వార్మప్‌లోనే వార్నింగ్.. శ్రీలంకకు టీమిండియా షాక్!

కలం, స్పోర్ట్స్ : శ్రీలంకతో తొలి టెస్టుకు ముందు టీమిండియా (Team India) అదిరిపోయే ప్రాక్టీస్ చేసింది. శ్రీలంక క్రికెట్  XIతో జరిగిన వార్మప్ మ్యాచ్‌లో భారత్ 6 వికెట్ల తేడాతో ఘన విజయం సాధించింది. 207 పరుగుల లక్ష్యాన్ని భారత బ్యాటర్‌లు  సునాయాసంగా ఛేదించారు. ఆగస్టు 15 నుంచి గాలే వేదికగా ప్రారంభం కానున్న తొలి టెస్టుకు ఈ మ్యాచ్ భారత జట్టుకు కీలకమైన మ్యాచ్ ప్రాక్టీస్‌ను అందించింది. ఈ వార్మప్ మ్యాచ్ సాధారణంగా నాలుగు రోజుల పాటు జరిగే ప్రాక్టీస్ కంటే ఎక్కువగా ఉపయోగపడిందని టీమిండియా బ్యాటింగ్ కోచ్ సితాంశు కొటక్ పేర్కొన్నారు. భారత ఆటగాళ్లకు పూర్తి స్థాయిలో మ్యాచ్ పరిస్థితులలో ఆడే అవకాశం లభించిందని తెలిపారు. బౌలర్లు తీవ్రతతో బౌలింగ్ చేయగా.. బ్యాటర్లు ఒత్తిడిలో బ్యాటింగ్ చేశారు. బౌలర్లకు కూడా బ్యాటింగ్ చేసే అవకాశం లభించడంతో అన్ని విభాగాల్లోనూ మంచి ప్రాక్టీస్ దక్కిందన్నారు.

పడిక్కల్ శతకం.. 357/6 వద్ద డిక్లేర్

భారత్ తొలి ఇన్నింగ్స్‌లో దేవదత్ పడిక్కల్ హైలైట్‌గా నిలిచాడు. అద్భుతంగా బ్యాటింగ్ చేసిన అతడు 164 బంతుల్లో 142 పరుగులతో నాటౌట్‌గా నిలిచాడు. అతని ఇన్నింగ్స్‌తో భారత్ 357/6 వద్ద తొలి ఇన్నింగ్స్‌ను డిక్లేర్ చేసింది. పిచ్ పేసర్లకు పెద్దగా సహకరించకపోయినా భారత ఫాస్ట్ బౌలర్లు పట్టుదలతో బౌలింగ్ చేశారు. గుర్నూర్ సింగ్ కూడా బౌలింగ్‌లో ఆకట్టుకున్నాడు.

ఛేజింగ్‌లో లోయర్ ఆర్డర్ జోరు

రెండో ఇన్నింగ్స్‌లో శ్రీలంక క్రికెట్ XI 200/6 వద్ద డిక్లేర్ చేయడంతో భారత్ ముందు 207 పరుగుల లక్ష్యం నిలిచింది. ఛేజింగ్‌లో ఓపెనర్లు యశస్వి జైస్వాల్, శుభ్‌మన్ గిల్ భారత్‌కు మంచి ఆరంభం అందించారు. గిల్ 54 బంతులలో 44 పరుగులు చేశాడు. అనంతరం లోయర్ ఆర్డర్ బ్యాటర్లు మ్యాచ్‌ను ముగించారు. రవీంద్ర జడేజా, రిషభ్ పంత్, మహ్మద్ సిరాజ్ కీలక పాత్ర పోషించారు. ముఖ్యంగా సిరాజ్ బ్యాట్‌తో మెరుపులు మెరిపించాడు. కేవలం 15 బంతుల్లో 32 పరుగులు చేసి నాలుగు సిక్సర్లతో అలరించాడు. దీంతో భారత్ 207 పరుగుల లక్ష్యాన్ని 6 వికెట్లు కోల్పోయి సునాయాసంగా ఛేదించింది.

ఆగస్టు 15 నుంచి గాలే టెస్టు

వార్మప్ మ్యాచ్‌లో బ్యాటర్లు, బౌలర్లు తమ సామర్థ్యాన్ని పరీక్షించుకోవడంతో శ్రీలంకతో టెస్టు సిరీస్‌కు ముందు టీమిండియాకు మంచి సన్నాహక అవకాశం లభించింది. ముఖ్యంగా మ్యాచ్ పరిస్థితుల్లో ఆడటం, ఒత్తిడిని ఎదుర్కోవడం జట్టుకు ఉపయోగపడనుంది. భారత్–శ్రీలంక తొలి టెస్టు ఆగస్టు 15 నుంచి గాలేలో ప్రారంభం కానుంది. వార్మప్ మ్యాచ్‌లో లభించిన మ్యాచ్ ప్రాక్టీస్‌తో టీమిండియా (Team India) టెస్టు సమరానికి మరింత ఆత్మవిశ్వాసంతో సిద్ధమవుతోంది.

Also Read : ‘నరేంద్ర’ పేరుపై పాక్ బాక్సర్ ఏడుపు.. మోదీ నవ్వులు!

Follow Us On: Instagram