కలం, సెంట్రల్ డెస్క్: దేశ రాజకీయాల్లో ఒక ఆసక్తికరమైన సెంటిమెంట్ ఇప్పుడు చర్చనీయాంశంగా మారింది. కేంద్ర ప్రభుత్వంలో అత్యంత కీలకమైన ‘విద్యాశాఖ’ (గతంలో మానవ వనరుల అభివృద్ధి శాఖ) బాధ్యతలు చేపట్టిన నేతలు.. ఆ పదవిలో ఉన్నంత కాలం జాతీయ స్థాయిలో నిరంతర వార్తల్లో ఉంటారు. కానీ, ఒక్కసారి ఆ కుర్చీ దిగితే మాత్రం.. వారు ఎంతటి పవర్ఫుల్ లీడర్స్ అయినా సరే, రాజకీయంగా లైమ్లైట్ నుంచి ఒక్కసారిగా దూరమై తెరవెనక్కు వెళ్లిపోతున్నారనే చర్చ పొలిటికల్ సర్కిల్స్లో గట్టిగా నడుస్తున్నది. నీట్ సంక్షోభం నేపథ్యంలో తాజాగా రాజీనామా చేసిన ధర్మేంద్ర ప్రధాన్ భవిష్యత్తు కూడా ఇలాగే మారుతుందని, బాధ్యతలు చేపట్టడానికి కొత్తవాళ్లు జంకుతున్నారు.
తెరవెనక్కు ‘నిశాంక్’
మోదీ 2.0 సర్కార్లో 2019 నుంచి 2021 వరకు విద్యాశాఖ మంత్రిగా (Education Ministry) పనిచేసిన రమేశ్ పోఖ్రియాల్ ‘నిశాంక్’ కథే దీనికి మొదటి ఉదాహరణ. దేశవ్యాప్తంగా ఎంతో హడావుడిగా కొత్త విద్యా విధానాన్ని తీసుకొచ్చి, విద్యాశాఖలో మునుపెన్నడూ లేని విధంగా నిరంతరం హెడ్లైన్స్లో నిలిచారు నిశాంక్. కానీ 2021 కేబినెట్ మార్పుల్లో ఆయన పదవి కోల్పోయిన తర్వాత.. తీవ్రమైన అనారోగ్య సమస్యల (కోవిడ్ అనంతర ఇబ్బందులు) కారణంగా పూర్తిగా రాజకీయ తెరవెనక్కు వెళ్లిపోయారు. జాతీయ మీడియాలో కానీ, ఢిల్లీ రాజకీయాల్లో కానీ ఆయన పేరు మళ్లీ మునుపటిలా ప్రముఖంగా వినిపించడం లేదు.
మళ్లీ కనిపించని జవదేకర్
బీజేపీలో అత్యంత చాకచక్యంగా మాట్లాడగల సీనియర్ నేత ప్రకాశ్ జవదేకర్ ప్రస్థానం కూడా విద్యాశాఖ తర్వాతే మలుపు తిరిగింది. 2016 నుంచి 2019 వరకు విద్యాశాఖ మంత్రిగా, ఆ తర్వాత సమాచార శాఖ మంత్రిగా ప్రభుత్వానికి ప్రధాన గొంతుకగా నిలిచారు జవదేకర్. ప్రతిరోజూ టీవీ స్క్రీన్లపై కనిపిస్తూ లైమ్లైట్లో ఉన్న ఈయనను 2021 కేబినెట్ ప్రక్షాళనలో మంత్రి పదవి నుంచి తొలగించారు. ఆ తర్వాత ఆయన కేవలం పార్టీ అంతర్గత వ్యవహారాలు, కేరళ వంటి రాష్ట్రాల ఎన్నికల ఇన్ఛార్జ్ బాధ్యతలకే పరిమితమయ్యారు తప్ప, జాతీయ రాజకీయాలను శాసించే మునుపటి గ్లామర్ కోల్పోయారు.
స్మృతి ఇరానీదీ ఇదే పరిస్థితి
2014లో మోదీ మొదటిసారి ప్రధాని అయినప్పుడు దేశంలోనే అత్యంత హాట్ టాపిక్గా మారిన నియామకం స్మృతి ఇరానీదే. అతి చిన్న వయసులోనే మానవ వనరుల అభివృద్ధి శాఖ మంత్రిగా బాధ్యతలు చేపట్టి, జేఎన్యూ వివాదాలు, సిలబస్ గొడవలతో జాతీయ మీడియాను షేక్ చేశారు. ఆ తర్వాత అమేఠీలో రాహుల్ గాంధీని ఓడించి ‘జెయింట్ కిల్లర్’గా ఎదిగారు. అయితే, విద్యాశాఖ నుంచి మారిన తర్వాత వేర్వేరు శాఖలు చూసినా.. ఇటీవల జరిగిన 2024 లోక్సభ ఎన్నికల్లో ఆమె అమేఠీ స్థానం నుండి ఓడిపోవడంతో, ప్రస్తుత మోదీ 3.0 కేబినెట్లో చోటు దక్కక పూర్తిగా పక్కకు తగ్గాల్సి వచ్చింది.
యూపీఏ హయాంలోనూ ఇదే సీన్
ఈ సెంటిమెంట్ కేవలం బీజేపీ మంత్రులకు మాత్రమే పరిమితం కాలేదు. గత కాంగ్రెస్ ప్రభుత్వ హయాంలోనూ స్పష్టంగా కనిపించింది. యూపీఏ-2 హయాంలో (2009-2012) మానవ వనరుల అభివృద్ధి శాఖ మంత్రిగా విప్లవాత్మక మార్పులు తీసుకొచ్చిన ప్రముఖ న్యాయకోవిదుడు కపిల్ సిబల్ ఆ తర్వాత క్రమంగా జాతీయ రాజకీయాల్లో మునుపటి పట్టును కోల్పోయారు. కాంగ్రెస్ పార్టీకి ట్రబుల్ షూటర్గా, ప్రభుత్వానికి ప్రధాన వాయిస్గా ఉన్న సిబల్.. విద్యాశాఖ నుంచి తప్పుకున్నాక పార్టీతో విభేదాల వల్ల లేదా ఇతర కారణాల వల్ల తెరవెనక్కు వెళ్లాల్సి వచ్చింది. 2012-2014 మధ్య విద్యాశాఖ మంత్రిగా దేశవ్యాప్తంగా చక్రం తిప్పిన ఆంధ్రప్రదేశ్ నేత ఎమ్.ఎమ్. పల్లంరాజు కూడా 2014లో కాంగ్రెస్ ఓటమి తర్వాత జాతీయ, రాష్ట్ర రాజకీయాల్లో పెద్దగా కన్పించడం లేదు.
