కలం, స్పోర్ట్స్: లార్డ్స్ టెస్టు ఓటమి తర్వాత పాకిస్థాన్ క్రికెట్లో మరో కీలక పరిణామం చోటుచేసుకుంది. స్టార్ క్రికెటర్లు మహ్మద్ రిజ్వాన్, ఇమామ్-ఉల్-హక్కు నేషనల్ సైబర్ క్రైమ్ ఇన్వెస్టిగేషన్ ఏజెన్సీ.. ఎన్సీసీఐఏ (NCCIA) నోటీసులు జారీ చేసింది. వారి మొబైల్ ఫోన్ల నుంచి సేకరించిన సమాచారంపై ప్రశ్నించేందుకు ఈ నోటీసులు ఇచ్చినట్లు జియో న్యూస్ తెలిపింది. ఇంగ్లండ్తో లార్డ్స్లో జరిగిన టెస్టులో పాకిస్థాన్ 194 పరుగుల తేడాతో ఓడిపోయింది. ఈ ఓటమి తర్వాత పాకిస్థాన్ క్రికెట్ బోర్డు కీలక మార్పులు చేసింది.
ఏడుగురు ఆటగాళ్లను జట్టు నుంచి తప్పించి పాకిస్థాన్కు పంపింది. వారిలో రిజ్వాన్, ఇమామ్-ఉల్-హక్ కూడా ఉన్నారు. సల్మాన్ అలీ ఆఘా, అలీ ఉస్మాన్, ఆమిర్ జమాల్, అవైస్ జఫర్, ఖుర్రమ్ షాజాద్ కూడా స్వదేశానికి పంపబడ్డారు. అదే సమయంలో కోచింగ్ స్టాఫ్లోనూ మార్పులు జరిగాయి. హెడ్ కోచ్ సర్ఫరాజ్ అహ్మద్, బౌలింగ్ కోచ్ ఉమర్ గుల్ను తప్పించారు. వారి స్థానంలో మైక్ హెస్సన్, యాష్లే నోఫ్కే బాధ్యతలు చేపట్టారు.
ఇక రిజ్వాన్, ఇమామ్ మొబైల్ ఫోన్లను పీసీబీ స్వాధీనం చేసుకున్నట్లు సమాచారం. ఆ ఫోన్లను సంబంధిత అధికారులకు అప్పగించినట్లు తెలుస్తోంది. వాటి నుంచి లభించిన సమాచారాన్ని ఎన్సీసీఐఏ పరిశీలించనుంది. ఈ వ్యవహారంపై ఇప్పటికే ఇద్దరు ఆటగాళ్లకు ఎన్సీసీఐఏ నోటీసులు ఇచ్చింది. మరో పాకిస్థాన్ క్రికెటర్కు కూడా నోటీసు అందినట్లు సమాచారం. అయితే ఫోన్లను పీసీబీ ఎందుకు తీసుకుంది అనే విషయంపై బోర్డు అధికారిక వివరణ ఇవ్వలేదు. ఇదిలా ఉంటే.. రిజ్వాన్, ఇమామ్లను టెస్టు జట్టులోకి ఎంపిక చేయడంపైనా పీసీబీ విచారణ చేపట్టింది.
వెస్టిండీస్, ఇంగ్లండ్ టెస్టు పర్యటనలకు వారిని ఎంపిక చేయడానికి గల కారణాలను సెలెక్షన్/అడ్వైజరీ కమిటీ సభ్యుడిని బోర్డు వివరణ కోరింది. ఆగస్టు 31న ఇచ్చిన నోటీసులో ఎంపిక ప్రమాణాలు, ఆటగాళ్ల ప్రదర్శన, ఇతర అంశాలను పరిగణనలోకి తీసుకున్నారా అనే విషయాలను వివరించాలని కోరింది. 24 గంటల్లోగా లిఖితపూర్వక సమాధానం ఇవ్వాలని ఆదేశించింది. రిజ్వాన్, ఇమామ్లకు ఎన్సీసీఐఏ నోటీసులు ఇవ్వడంతో ఈ వ్యవహారం మరింత కీలకంగా మారింది. ప్రస్తుతం మొబైల్ డేటాపై దర్యాప్తు కొనసాగుతోంది.
