క‌లం, స్పోర్ట్స్: ఆసియా పారా గేమ్స్ 2026 రేస్ ట్రాక్‌పై సోమవారం తీవ్ర నాటకీయత నడిచింది. మహిళల 1500 మీటర్ల టీ11 పోటీల్లో కాంస్యం గెలిచిన ఆనందం భారత అథ్లెట్ రక్షిత రాజు (Rakshitha Raju) కు క్షణాల్లో ఆవిరైపోయింది. సాంకేతిక నిబంధన టీఆర్ 6.9ని ఉల్లంఘించారనే కారణంతో అధికారుల నుంచి రక్షితపై అనర్హత వేటు పడింది. ఈ ఊహించని పరిణామంతో నాలుగో స్థానంలో నిలిచిన భారత్‌కే చెందిన రవణ్ణి వలసనానిని కాంస్య పతకం వరించింది. రేసు ముగిసేసరికి రక్షిత రాజు తన గైడ్ తబ్రేజ్ ఖాన్‌తో కలిసి ఐదు నిమిషాల 31.45 సెకన్లలో ఫినిషింగ్ లైన్ దాటి మూడో స్థానంలో నిలిచారు.
కానీ సాంకేతిక తనిఖీల్లో దుస్తులు, పాదరక్షలు లేదా బిబ్ నిబంధనల ఉల్లంఘన జరిగినట్లు తేలడంతో అధికారులు ఆమె ఫలితాన్ని రద్దు చేశారు. దీనిపై పూర్తిస్థాయి అధికారిక ధృవీకరణ రావలసి ఉంది. మరోవైపు గైడ్ రాహుల్ బాలకృష్ణతో కలిసి ఐదు నిమిషాల 41.85 సెకన్లలో రేసును నాలుగోదిగా ముగించిన రవణ్ణి వలసనాని.. రక్షిత డిస్క్వాలిఫికేషన్‌తో ఒక్కసారిగా మూడో స్థానానికి చేరి కాంస్యం ఖాయం చేసుకున్నారు. ఈ విభాగంలో చైనా రేసర్లు హే షాన్షాన్, హువాంగ్ జెంగ్లీ వరసగా స్వర్ణ, రజతాలను కైవసం చేసుకున్నారు.
ఒక్క ఘటన పక్కన పెడితే, సోమవారం నాటి పోటీల్లో భారత్ పతకాల వేటను వేగవంతం చేసింది. మహిళల 1500 మీటర్ల టీ12/టీ13లో సౌమ్య కుమార్ స్వర్ణం, రాధా వెంకటేష్ రజతం సాధించి భారత్‌కు తిరుగులేని ఆధిక్యాన్ని ఇచ్చారు. పురుషుల జావెలెన్ త్రో ఎఫ్46 విభాగంలో రింకూ హుడా స్వర్ణం, అజీత్ సింగ్ యాదవ్ రజతంతో మెరిశారు. అలాగే లాంగ్ జంప్ టీ47లో నిషాద్ కుమార్ అద్భుత ప్రదర్శనతో స్వర్ణ పతకాన్ని ముద్దాడారు.
