కలం, స్పోర్ట్స్ : ఐపీఎల్ 2026లో భాగంగా పంజాబ్ కింగ్స్తో జరిగిన మ్యాచ్లో ముంబై ఇండియన్స్ బ్యాటర్ నమన్ ధీర్ (Naman Dhir) అద్భుతమైన హాఫ్ సెంచరీతో ఆకట్టుకున్నారు. అయితే తన ఇన్నింగ్స్ గురించి మాట్లాడుతూ ఆయన చేసిన వ్యాఖ్యలు ఇప్పుడు క్రీడా వర్గాల్లో చర్చనీయాంశంగా మారాయి. తాను ఆడిన ఒక షాట్ను ‘చెత్త షాట్’ అని స్వయంగా అభివర్ణించుకుంటూ ధీర్ నిజాయితీగా స్పందించారు. అదే సమయంలో క్వింటన్ డికాక్ బ్యాటింగ్ను ధీర్ కొనియాడారు. డికాక్ ఆడిన కొన్ని షాట్లు నమ్మశక్యం కానివని, ముఖ్యంగా ఇన్నింగ్స్ మొదటి బంతికే కవర్స్ మీదుగా బాదిన షాట్ ఆయన క్లాస్కు నిదర్శనమని ప్రశంసించారు. ధీర్ తన తప్పులను ఒప్పుకుంటూనే బాధ్యతాయుతమైన ఇన్నింగ్స్ ఆడటం ముంబై జట్టుకు కలిసొచ్చింది.
ముంబైలోని వాంఖడే స్టేడియంలో గురువారం జరిగిన ఈ మ్యాచ్లో ముంబై ఇండియన్స్ తొలుత బ్యాటింగ్ చేసింది. అయితే 12 పరుగులకే రెండు వికెట్లు కోల్పోయి జట్టు కష్టాల్లో ఉన్నప్పుడు నమన్ ధీర్ క్రీజులోకి వచ్చారు. తాను 10 పరుగుల వద్ద ఉన్నప్పుడు యుజ్వేంద్ర చాహల్ తన క్యాచ్ను వదిలేశారని, ఆ సమయంలో తాను ఆడింది అత్యంత చెత్త షాట్ అని ధీర్ వ్యాఖ్యానించారు. అదృష్టవశాత్తు ఆ క్యాచ్ చేజారడంతో తనకు లైఫ్ లభించిందని ఆయన వెల్లడించారు.
ఆ తర్వాత పుంజుకున్న ధీర్ (Naman Dhir) కేవలం 31 బంతుల్లో 50 పరుగులు చేసి ముంబై స్కోరును పరుగులు పెట్టించారు. తన ఇన్నింగ్స్లో 3 ఫోర్లు, 3 సిక్సర్లు బాదిన ఆయన.. టీ20 క్రికెట్లో 1,000 పరుగుల మైలురాయిని కూడా అందుకున్నారు. ఇన్నింగ్స్ విరామ సమయంలో మాట్లాడుతూ.. తాను బంతిని బలంగా బాదే ప్రయత్నం చేయనని, కేవలం సరైన టైమింగ్తో ఆడతానని చెప్పారు. పిచ్ కాస్త నెమ్మదిగా ఉందని, తాము అనుకున్న దానికంటే 20 పరుగులు తక్కువగా చేశామని ఆయన అభిప్రాయపడ్డారు.
