మధ్యప్రదేశ్, మహారాష్ట్ర, ఛత్తీస్‌గఢ్ రాష్ట్రాల ముఖ్యమంత్రులకు మావోయిస్టులు(Maoists) లేఖ పంపించారు. తాము ఆయుధాలు వదిలిపెట్టేందుకు సిద్ధంగా ఉన్నామని వారు ఆ లేఖలో తెలిపారు. ప్రస్తుతం ఆయా రాష్ట్రాల్లో కొనసాగుతున్న కూంబింగ్ ఆపరేషన్లను వెంటనే నిలిపివేయాలనే కోరారు. భద్రతా బలగాలు కూంబింగ్ ఆపరేషన్ నిలిపివేస్తే తాము ఆయుధాలు ఎప్పుడు వదిలిపెడతామో అధికారికంగా ఓ తేదీని ప్రకటించేందుకు సిద్ధమని లేఖలో పేర్కొన్నారు.
మావోయిస్టులు(Maoists) తమ అంతర్గత చర్చలను పూర్తిచేసుకోవడానికి 2026 ఫిబ్రవరి 15 వరకు సమయం కోరారు. ఈ గడువులో నిర్ణయానికి రావడానికి అవకాశం ఇవ్వాలని లేఖలో తెలిపారు. రాష్ట్ర ప్రభుత్వాలు కూంబింగ్ ఆపరేషన్‌ను తాత్కాలికంగా నిలిపివేస్తే, ఎంఎంసీ జోన్ ప్రాంతంలో కార్యకలాపాలు సాగిస్తున్న మావోయిస్టులు అందరూ సామూహికంగా లొంగిపోవడానికి సిద్ధంగా ఉన్నట్లు స్పష్టం చేశారు.
ఇటీవలి నెలల్లో ఈ మూడు రాష్ట్రాల్లో భద్రతా దళాలు అటవీ ప్రాంతాల్లో భారీ స్థాయిలో శోధన చర్యలు చేపట్టాయి. ఈ ఆపరేషన్ల వల్ల మావోయిస్టులపై ఒత్తిడి పెరిగిన నేపథ్యంలోనే ఈ లేఖ వెలువడినట్లు భావిస్తున్నారు. మావోయిస్టుల నుండి వచ్చిన ఈ ప్రతిపాదనపై ఇప్పుడు రాష్ట్ర ప్రభుత్వాలు ఎలా స్పందిస్తాయన్నది ఆసక్తికర అంశంగా మారింది.
Read Also: సుప్రీంకోర్టు నూతన సీజేఐగా జస్టిస్‌ సూర్యకాంత్‌ ప్రమాణం
Follow Us on : Pinterest
