కలం, వెబ్ డెస్క్: దర్శకుడిని కిడ్నాప్ చేసి, దారుణంగా హింసించి, దోచుకున్న కేసులో ఓ కన్నడ నటిని (Ash Melo) పోలీసులు అరెస్ట్ చేశారు. కలకలం సృష్టించిన ఈ సంఘటన కర్ణాటక రాజధాని బెంగళూరులో జరిగింది. పోలీసులు తెలిపిన వివరాల ప్రకారం.. అనీశ్ ముంబైలో మోడలింగ్, క్యాస్టింగ్ ఏజెన్సీ నడుపుతున్నాడు. ప్రస్తుతం ‘జీవద భాషె’ అనే కన్నడ సినిమాకు దర్శకత్వం వహిస్తున్నాడు. ఈ సినిమాకు సంబంధించి పెట్టుబడి విషయంలో అశీ(అశీర్వాద్) అనే వ్యక్తితో గొడవలు ఉన్నాయి. దీనిపై కేసులు కూడా నమోదయ్యాయి.
ఈ క్రమంలో అనీశ్ హోండా సీఆర్వీ కారును కొంటామంటూ కొందరు సంప్రదించడంతో ఈ నెల 9న బెంగళూరుకు వచ్చాడు. నగర శివారులోని వాళ్లు సూచించిన ఓ ప్రాంతానికి చేరుకోగానే, అప్పటికే అక్కడ మాటువేసి ఉన్న దుండగులు అనీశ్ను బంధించారు. కర్రలతో విపరీతంగా కొట్టారు. తమపై పెట్టిన కేసుల విత్ డ్రా చేసుకోవాలంటూ హింసించారు. అతని ఒంటి మీద నగలు, జేబులో ఉన్న నగదు దోచుకున్నారు. క్రెడిట్ కార్డులు తీసుకొని డబ్బులు డ్రా చేసుకున్నారు. తీవ్రంగా కొట్టిన తర్వాత సమీపంలోని ఓ ఆస్పత్రిలో వదిలేసి పారిపోయారు.
దీనిపై ఆలస్యంగా ఫిర్యాదు అందండంతో కేసు నమోదు చేసుకున్న ఆడుగోడి పోలీసులు దర్యాప్తు ప్రారంభించారు. ప్రధాన నిందితుడితోపాటు మరో పది మందిని గురువారం అరెస్ట్ చేశారు. ఇందులో కన్నడ నటి ఐశ్వర్య (ఆష్ మెలో) కూడా ఉంది. డైరెక్టర్ను కిడ్నాప్ చేసి, బెదిరించి, కొట్టి, దోచుకున్న ఘటనలో ఆమె (Ash Melo) ప్రమేయమూ ఉన్నట్లు పోలీసులు నిర్దారణకు వచ్చారు.
Read Also : రెవెన్యూ శాఖ అవినీతిలో కూరుకుపోయింది: హరీశ్ రావు
Follow Us On: Instagram
