కలం, నిజామాబాద్ బ్యూరో: ప్రజాకవి, తెలంగాణ వైతాళికుడు, పద్మవిభూషణ్ కాళోజీ నారాయణరావు జయంతి (Kaloji Narayana Rao Jayanti) సందర్భంగా టీపీసీసీ అధ్యక్షులు, ఎమ్మెల్సీ మహేష్ కుమార్ గౌడ్ (Mahesh Kumar Goud) ఆయనకు ఘన నివాళులు అర్పించారు. తెలంగాణ సమాజం, ప్రజల హక్కులు, సామాజిక న్యాయం కోసం కాళోజీ చేసిన పోరాటం చిరస్మరణీయమని పేర్కొన్నారు. కాళోజీ తన సాహిత్యం ద్వారా ప్రజల సమస్యలను, సామాజిక అసమానతలను, పాలకుల వైఖరిని ప్రశ్నిస్తూ ప్రజల్లో చైతన్యం తీసుకొచ్చారని మహేష్ కుమార్ గౌడ్ అన్నారు.
“నా గొడవ” వంటి రచనల ద్వారా సామాన్యుడి గొంతుకగా నిలిచారని గుర్తుచేశారు. తెలంగాణ ప్రత్యేక రాష్ట్ర ఉద్యమంతో పాటు ప్రజాస్వామ్య విలువలు, మానవ హక్కులు, సామాజిక న్యాయం కోసం కాళోజీ జీవితాంతం పోరాడారని తెలిపారు. ఆయన రచనల్లో తెలంగాణ ప్రజల జీవన విధానం, యాస, భాష, సంస్కృతి ప్రతిబింబించాయని అన్నారు. అన్యాయాన్ని ప్రశ్నించడం, అణగారిన వర్గాల తరఫున నిలబడటం, ప్రజాస్వామ్యాన్ని పరిరక్షించడం వంటి కాళోజీ ఆశయాలను నేటి తరం ముందుకు తీసుకెళ్లాలని మహేష్ కుమార్ గౌడ్ (Mahesh Kumar Goud) పిలుపునిచ్చారు.
కాళోజీ స్ఫూర్తితో సమాజంలో సమానత్వం, సామాజిక న్యాయం, మానవతా విలువలను మరింత బలోపేతం చేయాల్సిన అవసరం ఉందన్నారు. కాళోజీ జయంతిని తెలంగాణ భాషా దినోత్సవంగా జరుపుకోవడం ఆయనకు దక్కిన అరుదైన గౌరవమని, తెలంగాణ భాష, యాస, సంస్కృతికి కాళోజీ చేసిన సేవలు ఎప్పటికీ గుర్తుండిపోతాయని మహేష్ కుమార్ గౌడ్ పేర్కొన్నారు.
Also Read : కేసీఆర్‌పై వ్యాఖ్యల కలకలం.. ‘ఫ్లోలో అనేశాను’ అంటూ ఎమ్మెల్యే వివరణ
Follow Us On: X(Twitter)
