కలం, వెబ్ డెస్క్: ఇటీవల సీఎం రేవంత్ రెడ్డి (CM Revanth)పై వివాదాస్పద వ్యాఖ్యలు చేసిన దేవరకొండ జనసేన నాయకుడు చందు నాయక్ (Chandu Naik)ను పోలీసులు అరెస్ట్ చేశారు. తెలంగాణ ఆవిర్భావ దినోత్సవం సందర్భంగా ఇటీవల జనసేన (Janasena) అధినేత పవన్ కల్యాణ్ తలపెట్టిన సభకు ప్రభుత్వం అనుమతి నిరాకరించిన విషయం తెలిసిందే. ఈ నేపథ్యంలో అదే రోజు పవన్ కల్యాణ్ జూబ్లీహిల్స్లోని తన నివాసంలో మీడియాతో మాట్లాడారు. ఆ సమయంలో జన సైనికులు భారీ ఎత్తున అక్కడికి చేరుకున్నారు.
ఈ సందర్భంగా చందు నాయక్ సీఎం రేవంత్ రెడ్డిపై వివాదాస్పద వ్యాఖ్యలు చేశారు. సీఎం రేవంత్ రెడ్డి పవన్ సభకు అనుమతి ఇవ్వలేదని, ఆయనను బలిస్తామంటూ తీవ్ర స్థాయిలో మండిపడ్డారు. దీనికి సంబంధించిన వీడియోలు సోషల్ మీడియాలో వైరల్గా మారాయి. దీంతో పోలీసులు చందు నాయక్పై శుక్రవారం కేసు నమోదు చేసి నేడు ఆయనను అదుపులోకి తీసుకున్నారు. మరోవైపు జనసేన లీగల్ సెల్ తరఫున చందు నాయక్కు అండగా ఉంటామని పార్టీ ప్రకటించింది.
