కలం, ఖమ్మం బ్యూరో : ప్రశాంతంగా ప్రవహించే గోదావరి నది, ఎగువ ప్రాంతాల్లో కురుస్తున్న కుండపోత వర్షాల ధాటికి ఒక్కసారిగా ఉగ్రరూపం దాల్చింది. భద్రాద్రి కొత్తగూడెం జిల్లా భద్రాచలం ( Bhadrachalam ) వద్ద నది ప్రవాహం రోజురోజుకూ విపరీతంగా పెరుగుతుండటంతో తీర ప్రాంత వాసుల గుండెల్లో రైళ్లు పరిగెడుతున్నాయి. నిన్నటి వరకు ఎంతో సాధారణంగా సాగిన గోదారమ్మ, కేవలం గడిచిన 24 గంటల వ్యవధిలోనే ఏకంగా 13 అడుగుల నీటిమట్టాన్ని సంతరించుకుని 16 అడుగుల నుండి ఏకంగా 29 అడుగులకు చేరుకుంటుండడం ప్రవాహ తీవ్రతకు నిదర్శనంగా నిలుస్తోంది.
ప్రస్తుతం భద్రాచలం వద్ద గోదావరి నది రెండు వైపులా ఒడ్డులను తాకుతూ భయానక వాతావరణాన్ని సృష్టిస్తోంది. గురువారం మధ్యాహ్నం 2 గంటల సమయానికి భద్రాచలం వద్ద నది నుంచి 4,06,111 క్యూసెక్కుల భారీ నీరు దిగువకు ప్రవహిస్తోంది. పెరిగిన ఉధృతితో వరద నీరు రామాలయ ప్రాంగణంలోని కరకట్టను, స్నానఘట్టాలను ముంచెత్తుతోంది. నీటిమట్టం ఇదే వేగంతో పెరిగి 43 అడుగులకు చేరితే అధికారులు మొదటి ప్రమాద హెచ్చరికను జారీ చేయడానికి సన్నద్ధమవుతున్నారు. ఆ సమయానికి నీటి విడుదల ఏకంగా 9.32 లక్షల క్యూసెక్కులకు చేరుకునే అవకాశం ఉంది.
మరోవైపు చర్ల మండలంలోని తాలిపేరు మధ్య తరహా ప్రాజెక్టులోకి కూడా వరద హోరెత్తుతోంది. ఎగువ ప్రాంతమైన ఛత్తీస్గఢ్లో కురుస్తున్న భారీ వర్షాలకు జలాశయంలో జలకళ ఉట్టిపడుతోంది. ప్రాజెక్ట్ లోకి ప్రస్తుతం 74,217 క్యూసెక్కుల ఇన్-ఫ్లో వస్తుండటంతో అధికారులు 24 గేట్లను ఎత్తి 71,457 క్యూసెక్కుల నీటిని దిగువ గోదావరికి విడుదల చేస్తున్నారు. డీఈఈ తిరుపతి, ఏఈఈ సంపత్ ల పర్యవేక్షణలో జలాశయ పరిస్థితిని నిరంతరం సమీక్షిస్తున్నారు. తాలిపేరుతో పాటు పగిడివాగు, రొటెంత్ వాగు, రాళ్లవాగు, అటవీ ప్రాంతాల్లోని పలు వాగులు పొంగిపొర్లుతుండటంతో ఏజెన్సీ పరిధిలో రాకపోకలు స్తంభించిపోయాయి. ముఖ్యంగా కున్నపల్లి, రామచంద్రాపురం గ్రామాల మధ్య వాగు ప్రవాహం తీవ్రంగా ఉండటంతో గత రెండు రోజులుగా బాహ్య ప్రపంచంతో సంబంధాలు పూర్తిగా నిలిచిపోయాయి.
ఒక్కసారిగా పెరిగిన ప్రవాహాన్ని చూస్తుంటే భద్రాచలం ప్రజలకు గతంలో విరుచుకుపడిన ప్రళయాలు గుర్తుకొస్తున్నాయి. 1986లో అత్యధికంగా 75.60 అడుగుల నీటిమట్టంతో 27.02 లక్షల క్యూసెక్కుల వినాశకర ప్రవాహం ముంచెత్తగా, 2022లో కూడా నీటిమట్టం 71.30 అడుగులకు చేరి విలయతాండవం చేసింది. ప్రస్తుతం నీటిమట్టం ఇంకా ప్రమాదకర స్థాయికి చేరకపోయినప్పటికీ, ఎగువ నుంచి వస్తున్న ప్రవాహ వేగం ప్రజలను తీవ్ర కలవరానికి గురిచేస్తోంది.
ఈ పరిణామాల నేపథ్యంలో జిల్లా యంత్రాంగం తీవ్ర అప్రమత్తమైంది. జిల్లా కలెక్టర్ అంకిత్ అధికారులతో అత్యవసర సమీక్ష నిర్వహించి, లోతట్టు ప్రాంతాల ప్రజలను సురక్షిత ప్రాంతాలకు తరలించేందుకు, పునరావాస కేంద్రాలను సిద్ధం చేయడానికి చర్యలు చేపట్టారు. వర్షాలు, వరదల తీవ్రత దృష్ట్యా తీరప్రాంత ప్రజలు, మత్స్యకారులు ఏమాత్రం నిర్లక్ష్యం వహించవద్దని, అత్యవసరమైతే తప్ప ఇళ్ల నుంచి బయటకు రాకూడదని అధికారులు, ప్రజాప్రతినిధులు హెచ్చరికలు జారీ చేశారు.
