పతకాలకు కొత్త రూపం.. గ్లాస్గో సంచలన నిర్ణయం

కలం, స్పోర్ట్స్ : గ్లాస్గో 2026 (Glasgow 2026) కామన్వెల్త్ గేమ్స్ (Commonwealth Games) సరికొత్త చరిత్రకు వేదిక కానుంది. దృష్టి లోపం ఉన్న అథ్లెట్లు కూడా తమ విజయ క్షణాలను పూర్తిగా ఆస్వాదించేలా ఈసారి పతకాలను ప్రత్యేకంగా రూపొందిస్తున్నారు. బ్రెయిలీ అక్షరాలు, స్పర్శ ద్వారా గుర్తించగల అంశాలను పతకాల రూపకల్పనలో చేర్చడం విశేషం. క్రీడలలో ప్రతి ఒక్కరినీ భాగస్వామ్యం చేయాలనే లక్ష్యంతో నిర్వాహకులు ఈ వినూత్న నిర్ణయం తీసుకున్నారు.

ఈ దృక్పథానికి అనుగుణంగా గ్లాస్గో కామన్వెల్త్ గేమ్స్‌లో పారా క్రీడలకు ప్రత్యేక ప్రాధాన్యం ఇచ్చారు. ఆరు పారా క్రీడలలో రికార్డు స్థాయిలో 47 స్వర్ణ పతకాలు కేటాయించారు. ఇది కామన్వెల్త్ గేమ్స్ చరిత్రలోనే అతిపెద్ద పారా స్పోర్ట్స్ ప్రోగ్రామ్‌గా నిలవనుంది. మొత్తంగా 10 సాధారణ క్రీడలు, ఆరు పారా క్రీడలలో కలిపి అథ్లెట్లు 215 స్వర్ణ పతకాల కోసం పోటీపడనున్నారు.

వినూత్న ఆకృతిలో పతకాలు

సాధారణంగా ఉండే గుండ్రటి ఆకారానికి భిన్నంగా ఈసారి కామన్వెల్త్ గేమ్స్ పతకాలను గ్లాస్గో నగర అధికారిక గుర్తింపును ప్రతిబింబించేలా “రియులో త్రిభుజం” (Reuleaux Triangle) ఆకారంలో రూపొందించారు. పతకాలపై గ్లాస్గో నగర ప్రత్యేకతలను ప్రతిబింబించే పలు అంశాలను చేర్చారు. నగర నౌకా నిర్మాణ రంగానికి ప్రతీకగా నిలిచే అంశాలతో పాటు, ప్రసిద్ధ ఫిన్నియస్టన్ క్రేన్ స్ఫూర్తితో చెక్కడపు నమూనాలను రూపొందించారు. అలాగే స్కాట్లాండ్ సంస్కృతికి ప్రతీక అయిన “టార్టన్” డిజైన్‌ను స్పర్శ ద్వారా గుర్తించేలా పతకాల ఉపరితలంపై తీర్చిదిద్దారు. విజేతల పీఠంలోని మొదటి, రెండో, మూడో స్థానాలను సూచించేలా మూడు స్థాయిల ఎత్తుపల్లాలను కూడా ఇందులో ఏర్పాటు చేశారు.

కళాకారిణి మిలిట్సా మిలెన్కోవా డిజైన్

బుల్గేరియాలో జన్మించి ప్రస్తుతం గ్లాస్గో స్కూల్ ఆఫ్ ఆర్ట్‌లో పనిచేస్తున్న అవార్డు గ్రహీత కళాకారిణి మిలిట్సా మిలెన్కోవా ఈ పతకాలను డిజైన్ చేశారు. సిల్వర్‌స్మిథింగ్, జ్యువెలరీ విభాగానికి చెందిన విద్యార్థులు, కళాకారులు సమర్పించిన పలు నమూనాల నుంచి ఈ డిజైన్‌ను ఎంపిక చేశారు. కామన్వెల్త్ గేమ్స్ పతకాలు ఎప్పుడూ ఆతిథ్య నగర సంస్కృతి, గుర్తింపును ప్రతిబింబిస్తాయి. అయితే గ్లాస్గో 2026 (Glasgow 2026) మాత్రం దానికి మరో అడుగు ముందుకేసి, బ్రెయిలీ ఆధారిత పతకాలతో సమానత్వం, అందరికీ అందుబాటు అనే కొత్త అధ్యాయాన్ని క్రీడా చరిత్రలో ప్రారంభిస్తోంది.

Read Also: ‘వాంగ్‌చుక్’ మరో అన్నా హజారే.. సీజేపీ, కాంగ్రెస్ సంచలన వ్యాఖ్యలు

Follow Us On : WhatsApp