కలం, వెబ్ డెస్క్: ఐపీఎల్ పోరులో ఢిల్లీ క్యాపిటల్స్ (Delhi Capitals) అదరగొట్టింది. రాయల్ ఛాలెంజర్స్ బెంగళూరు (RCB) నిర్దేశించిన 176 పరుగుల లక్ష్యాన్ని ఛేదించి సంచలన విజయాన్ని నమోదు చేసింది. చివరి వరకు ఉత్కంఠ భరితంగా సాగిన పోరులో ఢిల్లీ అదరగొట్టింది. ఆదిలో తడబడినా, ట్రిస్టన్ స్టబ్స్ (60 నాటౌట్), కె.ఎల్. రాహుల్ (57) బాధ్యతాయుత ఇన్నింగ్స్లతో జట్టును విజయతీరాలకు చేర్చారు. ఒకానొక దశలో భువనేశ్వర్ కుమార్ దెబ్బకు 18 పరుగులకే 3 వికెట్లు కోల్పోయి పీకల్లోతు కష్టాల్లో పడ్డ ఢిల్లీని ఈ ఇద్దరూ ఆదుకుని మ్యాచ్ను మలుపు తిప్పారు.
టాస్ ఓడి బ్యాటింగ్కు దిగిన రాయల్ ఛాలెంజర్స్ బెంగళూరు నిర్ణీత 20 ఓవర్లలో 8 వికెట్ల నష్టానికి 175 పరుగులు చేసింది. ఓపెనర్ ఫిల్ సాల్ట్ (63 పరుగులు, 38 బంతుల్లో, 4 ఫోర్లు, 3 సిక్సర్లు) ఆరంభం నుంచే ఢిల్లీ బౌలర్లపై విరుచుకుపడ్డాడు. విరాట్ కోహ్లీ (19), దేవదత్ పడిక్కల్ (18) మెరుపులు మెరిపించినా ఎక్కువ సేపు క్రీజులో నిలవలేకపోయారు. మిడిల్ ఆర్డర్లో టిమ్ డేవిడ్ (26) కాసేపు పోరాడినా, మిగిలిన వారు విఫలం కావడంతో ఆర్సీబీ భారీ స్కోరు సాధించలేకపోయింది. ఢిల్లీ బౌలర్లలో అక్షర్ పటేల్, కుల్దీప్ యాదవ్, లుంగీ ఎన్గిడి చెరో రెండు వికెట్లతో ఆర్సీబీ నడుం విరిచారు.
భువీ స్పెల్ వృథా.. స్టబ్స్ షో అదుర్స్!
176 పరుగుల లక్ష్యంతో బరిలోకి దిగిన ఢిల్లీకి (Delhi Capitals) ఆరంభంలోనే షాక్ తగిలింది. స్వింగ్ మాస్టర్ భువనేశ్వర్ కుమార్ తన పదునైన బంతులతో నిస్సాంక (1), కరుణ్ నాయర్ (5), సమీర్ రిజ్వీ (2)లను పెవిలియన్ పంపి బెంగళూరు క్యాంపులో జోష్ నింపారు. అయితే, కె.ఎల్. రాహుల్ నిలకడగా ఆడుతూ స్కోరు బోర్డును ముందుకు నడిపించగా, అతనికి స్టబ్స్ తోడయ్యాడు. రాహుల్ 34 బంతుల్లో 57 పరుగులు (6 ఫోర్లు, 2 సిక్సర్లు) చేసి అవుట్ అవ్వగా, స్టబ్స్ తన క్లాస్ ఆటతో 47 బంతుల్లో 60 పరుగులు చేసి అజేయంగా నిలిచాడు. చివర్లో డేవిడ్ మిల్లర్ (22 నాటౌట్, 10 బంతులు) మెరుపులు మెరిపించడంతో ఢిల్లీ 19.5 ఓవర్లలోనే విజయాన్ని అందుకుంది.
Read Also: విపక్షాలపై నిప్పులు చెరిగిన ప్రధాని మోదీ
Follow Us On: X(Twitter)
