కలం, స్పోర్ట్స్: కామన్వెల్త్ గేమ్స్ 2026 (Commonwealth Games) సమరానికి కౌంట్డౌన్ మొదలైంది. మరో వారంలో ప్రారంభం కానున్న ఈ మెగా ఈవెంట్ కోసం భారత అథ్లెట్లు ఇప్పటికే గ్లాస్గో చేరుకున్నారు. అక్కడ వాతావరణానికి అలవాటు పడేందుకు ముమ్మరంగా ప్రాక్టీస్ చేస్తున్నారు. జూలై 23న జరిగే ప్రారంభ వేడుకల్లో భారత్ తరఫున 125 మంది అథ్లెట్లు మార్చ్ ఫాస్ట్లో పాల్గొనబోతున్నారు. ఆ తర్వాత 10 రోజుల పాటు జరిగే పతకాల వేటలో మనవాళ్లు గట్టి పోటీ ఇవ్వనున్నారు.
స్టార్ ఆటగాళ్లపైనే అందరి కళ్లు
ఈసారి భారత్ భారీ ఆశలతో బరిలోకి దిగుతోంది. గత ఎడిషన్కు దూరమైన రెండ్రుల ఒలింపిక్ పతక విజేత నీరజ్ చోప్రా మళ్లీ కామన్వెల్త్ బరిలోకి దిగుతున్నారు. 2018 లో సాధించిన పసిడి పతకాన్ని ఈసారి కూడా పునరావృతం చేయాలని ఆయన చూస్తున్నారు. అలాగే వెయిట్లిఫ్టింగ్ స్టార్ మీరాబాయి చాను కూడా మరో పసిడి పతకంపై కన్నేశారు. అథ్లెటిక్స్, వెయిట్లిఫ్టింగ్, బాక్సింగ్ ఆటలపైనే భారత్ ఎక్కువ ఆశలు పెట్టుకుంది. జుడో, పారా అథ్లెటిక్స్ నుంచి కూడా మంచి ఫలితాలు వచ్చే అవకాశం ఉంది.
వివిధ క్రీడల్లో పతకాల అంచనాలు ఇవే:
అథ్లెటిక్స్: భారత్ నుంచి 32 మందితో కూడిన పెద్ద బృందం వెళ్తోంది. నీరజ్ చోప్రా, మురళి శ్రీశంకర్, ప్రవీణ్ చిత్రవేల్, సర్వేష్ కుషారే కీలకమైన జంప్స్ విభాగాల్లో పోటీ పడుతున్నారు. ట్రాక్ ఈవెంట్లలో గుల్వీర్ సింగ్, పారుల్ చౌదరిపై ఆశలు ఉన్నాయి. ఈ విభాగంలో భారత్ 5 నుంచి 7 పతకాలు సాధించే అవకాశం ఉంది.
బాక్సింగ్: 14 మందితో కూడిన పూర్తి స్థాయి బాక్సింగ్ జట్టు బరిలో ఉంది. ప్రపంచ ఛాంపియన్ జైస్మిన్ లంబోరియా, లవ్లీనా బొర్గోహైన్ ఈ బృందంలో ఉన్నారు. మహిళల విభాగంలో సాక్షి చౌదరి, ప్రీతి పవార్ గట్టి పోటీ ఇవ్వనున్నారు. బాక్సింగ్లో భారత్కు 10 నుంచి 11 పతకాలు వచ్చే ఛాన్స్ ఉంది.
వెయిట్లిఫ్టింగ్: మీరాబాయి చాను నాయకత్వంలో 12 మంది వెళ్తున్నారు. జ్ఞానేశ్వరి యాదవ్, రాజా ముత్తుపాండి కూడా పతకాల రేసులో ఉన్నారు. ఇందులో 9 నుంచి 10 మెడల్స్ రావచ్చు.
జుడో: జుడోలో తొలిసారి స్వర్ణం కోసం తులకా మాన్, అస్మితా దే శ్రమిస్తున్నారు. యువ ఆటగాళ్లు ఇన్యుంగన్బి, ఇష్రూప్ నారంగ్ కూడా రేసులో ఉన్నారు. దీని నుంచి 4-5 పతకాలు ఆశించవచ్చు.
పారా అథ్లెటిక్స్ & పవర్లిఫ్టింగ్: పారా అథ్లెటిక్స్లో సోమన్ రాణా, సబ్హామ్ జుయల్, దిలీప్ గావిత్ కీలకమైన ఆటగాళ్లు. వీరి నుంచి 4-5 పతకాలు వచ్చే అవకాశం ఉంది. పారా పవర్లిఫ్టింగ్లో అశోక్, పరమ్జీత్ కుమార్, సుధీర్ ల నుంచి మరో 1-2 పతకాలు రావచ్చు.
