క‌లం, స్పోర్ట్స్‌: ఫుట్‌బాల్ ప్రపంచం చూపంతా ఇప్పుడు ఒకే అవార్డుపై! ఎన్నో ఏళ్లుగా లియోనెల్ మెస్సీ, క్రిస్టియానో రొనాల్డో ఆధిపత్యం కొనసాగించిన బ్యాలన్ డి’ఓర్ (Ballon dOr) రేసులో ఇప్పుడు కొత్త తరం ఆటగాళ్లు సవాల్ విసురుతున్నారు. ఇంగ్లండ్ కెప్టెన్ హ్యారీ కేన్, స్పెయిన్ యువ సంచలనం లమైన్ యమాల్, ఫ్రాన్స్ స్టార్ కైలియన్ ఎంబాపే.. ఈసారి ప్రధాన పోటీదారులుగా నిలిచారు. మరోవైపు, 39 ఏళ్ల వయసులోనూ మెస్సీ పేరు రేసులో ఉండటం ప్రత్యేక ఆకర్షణగా మారింది. 2026 బ్యాలన్ డి’ఓర్ విజేతలను అక్టోబర్ 26న లండన్‌లో ప్రకటించనున్నారు.
అసలు బ్యాలన్ డి’ఓర్ అంటే ఏమిటి?
ఫుట్‌బాల్‌లో వ్యక్తిగతంగా అత్యుత్తమ ప్రదర్శన చేసిన ఆటగాడికి ఇచ్చే ప్రతిష్ఠాత్మక పురస్కారమే బ్యాలన్ డి’ఓర్. ఫ్రెంచ్ భాషలో ఈ పదానికి ‘గోల్డెన్ బాల్’ అని అర్థం. ఫ్రాన్స్ ఫుట్‌బాల్ మ్యాగజైన్ 1956లో ఈ అవార్డును ప్రారంభించింది. ఈ ఏడాదితో దీనికి 70 ఏళ్లు పూర్తయ్యాయి. ఈసారి మరో ప్రత్యేకత కూడా ఉంది. సాధారణంగా పారిస్‌లో జరిగే ఈ వేడుక తొలిసారి లండన్‌లో నిర్వహిస్తున్నారు. లండన్‌లోని పల్లాడియం వేదికగా సోమవారం రాత్రి ఈ కార్యక్రమం జరగనుంది.
మెస్సీదే రికార్డు.. రొనాల్డో తర్వాతి స్థానం!
బ్యాలన్ డి’ఓర్ చరిత్రలో మెస్సీకి ప్రత్యేక స్థానం ఉంది. ఇప్పటివరకు అతడు ఎనిమిది సార్లు ఈ అవార్డును గెలుచుకున్నాడు. 2023లో చివరిసారిగా పురస్కారం అందుకున్నాడు. ఈ ఘనతలో అతడే అగ్రస్థానంలో ఉన్నాడు. పోర్చుగల్ స్టార్ క్రిస్టియానో రొనాల్డో ఐదుసార్లు ఈ అవార్డును గెలుచుకుని రెండో స్థానంలో ఉన్నాడు. మిషెల్ ప్లాటిని, జోహాన్ క్రైఫ్, మార్కో వాన్ బాస్టెన్ మూడేసి సార్లు ఈ పురస్కారాన్ని అందుకున్నారు.
ఈసారి ఎవరికి ఎక్కువ అవకాశాలు?
పురుషుల విభాగంలో 30 మంది ఆటగాళ్లు నామినేషన్లలో ఉన్నారు. అయితే హ్యారీ కేన్, లమైన్ యమాల్, కైలియన్ ఎంబాపే, లియోనెల్ మెస్సీ పేర్ల చుట్టూ ప్రధాన చర్చ సాగుతోంది. బయర్న్ మ్యూనిక్ తరఫున కేన్ గోల్స్‌తో అదరగొట్టాడు. క్లబ్ స్థాయిలో టైటిళ్లు గెలిచాడు. ప్రపంచకప్‌లోనూ ఇంగ్లండ్ తరఫున కీలక పాత్ర పోషించాడు. అందుకే అతడికి ఈసారి మంచి అవకాశాలున్నాయని అంచనాలు వెలువడుతున్నాయి. యమాల్ కూడా గట్టి పోటీదారుడే. బార్సిలోనా తరఫున రాణించడంతో పాటు స్పెయిన్ విజయాల్లో కీలక పాత్ర పోషించాడు.
చిన్న వయసులోనే ప్రపంచ ఫుట్‌బాల్‌లో తనకంటూ ప్రత్యేక గుర్తింపు తెచ్చుకున్నాడు. తొలి బ్యాలన్ డి’ఓర్‌ను గెలుచుకోవాలనే లక్ష్యంతో ఈసారి బరిలో ఉన్నాడు. ఎంబాపే వ్యక్తిగతంగా అద్భుత ప్రదర్శనలు చేసినప్పటికీ, జట్టు స్థాయిలో సాధించిన విజయాలు ఓటింగ్‌లో కీలకం కానున్నాయి. మెస్సీ విషయానికి వస్తే, వయసు పెరిగినా అతడి ప్రభావం తగ్గలేదు. ఈసారి అవార్డు గెలిస్తే తన రికార్డును మరింత పెంచుకుంటాడు.
మహిళల విభాగంలో కొత్త విజేత!
మహిళల బ్యాలన్ డి’ఓర్‌లో ఈసారి కొత్త విజేతను చూడబోతున్నారు. గత మూడు సంవత్సరాలుగా ఈ అవార్డును గెలుచుకున్న స్పెయిన్ స్టార్ ఐతానా బొన్మతీ గాయం కారణంగా ఈసారి నామినేషన్లలో చోటు దక్కించుకోలేదు. దీంతో మూడోసారి అవార్డు గెలుచుకునే అవకాశం అలెక్సియా పుటెల్లాస్‌కు ఉందనే అంచనాలు పెరిగాయి. బార్సిలోనా తరఫున ఛాంపియన్స్ లీగ్, స్పానిష్ లీగ్ టైటిళ్లు గెలవడంలో ఆమె కీలక పాత్ర పోషించింది. మాంచెస్టర్ సిటీకి చెందిన ఖదీజా షా, బార్సిలోనా ప్లేయర్ క్లాడియా పినా కూడా పోటీలో ఉన్నారు.
విజేతను ఎలా నిర్ణయిస్తారు?
బ్యాలన్ డి’ఓర్ విజేతను ఓటింగ్ ద్వారా ఎంపిక చేస్తారు. ఫిఫా ర్యాంకింగ్స్‌లో తొలి 100 దేశాలకు చెందిన ఒక్కో జర్నలిస్టు ఓటు వేస్తారు. ప్రతి జర్నలిస్టు 30 మంది నామినీల్లో నుంచి పది మందిని ఎంచుకుని ర్యాంకుల వారీగా ఓట్లు కేటాయిస్తారు. మొదటి స్థానంలో ఎంచుకున్న ఆటగాడికి 15 పాయింట్లు, పదో స్థానంలో ఉన్న ఆటగాడికి ఒక పాయింట్ వస్తుంది. అత్యధిక పాయింట్లు సాధించిన ఆటగాడే విజేత అవుతాడు. వ్యక్తిగత ప్రదర్శన, జట్టు విజయాలు, ఆటగాడి ప్రభావం, క్రీడాస్ఫూర్తి వంటి అంశాలను పరిగణనలోకి తీసుకుంటారు.
ఈసారి ఓటింగ్ కాలం 2025 ఆగస్టు 3 నుంచి 2026 జూలై 19 వరకు మాత్రమే. అంటే ఆ తర్వాతి మ్యాచ్‌ల్లో ఆటగాళ్లు ఎంత బాగా ఆడినా ఈ ఏడాది అవార్డు నిర్ణయంపై ప్రభావం ఉండదు. కేన్ ప్రస్తుత ఫామ్‌పై చర్చ జరుగుతున్నప్పటికీ, నిర్ణీత కాలంలో అతడి ప్రదర్శనే ఓటింగ్‌కు ప్రామాణికం.
