కలం, స్పోర్ట్స్: ప్రపంచకప్లో కాషాయం జెర్సీతో కనిపించిన భారత హాకీ (Hockey India) జట్లు.. ఇప్పుడు మళ్లీ తమ సంప్రదాయ నీలి రంగులోకి వస్తున్నాయి. సెప్టెంబర్ 8న హాకీ ఇండియా వెల్లడించిన వివరాల ప్రకారం.. ఆసియాడ్కు బ్లూను తొలి ఎంపికగా ఇచ్చింది. కాషాయం రెండో ఎంపికగా ఉంటుంది. భారత జట్ల జెర్సీ రంగుపై గతంలో పెద్ద చర్చ జరిగింది. ప్రపంచకప్కు ముందు సంప్రదాయ బ్లూ స్థానంలో కాషాయాన్ని హాకీ ఇండియా ఎంపిక చేసింది. బ్లూ జెర్సీ.. బ్లూ సింథటిక్ టర్ఫ్తో కలిసిపోవడంతో ఆటగాళ్లకు కనిపించడంలో ఇబ్బంది ఉండొచ్చని హాకీ ఇండియా వివరించింది.
అందుకే ప్రత్యామ్నాయ రంగులపై సూచనలు తీసుకుంది. చివరకు కాషాయాన్ని ఎంపిక చేసింది. అయితే ఈ మార్పుపై విమర్శలు వచ్చాయి. మాజీ కెప్టెన్ వీరెన్ రస్కిన్హా కూడా బ్లూ నుంచి మారడంపై ప్రశ్నలు లేవనెత్తారు. హాకీ ఇండియా అధ్యక్షుడు దిలీప్ టిర్కీ కూడా ఈ నిర్ణయం గురించి తనకు, ఎగ్జిక్యూటివ్ బోర్డుకు ముందుగా సమాచారం లేదని అప్పట్లో తెలిపారు. ఇప్పుడు ఆసియాడ్ కోసం పరిస్థితి మారింది. భారత ఒలింపిక్ సంఘం జెర్సీ రంగుపై హాకీ ఇండియా అభిప్రాయం కోరింది.
దీంతో బ్లూను తొలి ఎంపికగా, కాషాయాన్ని రెండో ఎంపికగా హాకీ ఇండియా సూచించింది. ఆసియాడ్కు సంబంధించి జెర్సీ ఎంపికలో ఇదే హాకీ ఇండియా ప్రాధాన్యత అని ట్రెజరర్ శేఖర్ మనోహరన్ తెలిపారు. దిలీప్ టిర్కీ కూడా బ్లూ ఎంపికను ధృవీకరించారు. ఆసియాడ్ భారత హాకీ జట్లకు కీలకమైన టోర్నీ. 2028 లాస్ ఏంజెల్స్ ఒలింపిక్స్ అర్హతకు కూడా ఈ టోర్నీ ముఖ్యమైన అవకాశంగా మారనుంది. ప్రస్తుతం మాత్రం స్పష్టత వచ్చింది. ఆసియాడ్లో భారత హాకీ జట్ల తొలి జెర్సీ రంగు బ్లూ. కాషాయం రెండో ఎంపికగా కొనసాగనుంది.
