కలం, ఖమ్మం బ్యూరో: గిరిజనుల ఆచార వ్యవహారాలు, సంస్కృతీ సాంప్రదాయాలకు అద్దంపట్టే సంబరం ‘తీజ్’. భద్రాద్రి కొత్తగూడెం (Bhadradri Kothagudem) జిల్లాలోని వెంకట్యా తండాలో ఈ తీజ్ పండుగ వేడుకలు అత్యంత వైభవంగా, ఆధ్యాత్మిక ఉత్సాహం నడుమ ఘనంగా జరిగాయి. మన గ్రామీణ, గిరిజన సంస్కృతికి పట్టం కడుతూ సాగిన ఈ వేడుకల్లో స్థానిక ఎమ్మెల్యే జారే ఆది నారాయణ (MLA Jare Adinarayana) ముఖ్య అతిథిగా పాల్గొని, బంజారాల ఆటపాటల్లో లీనమై ప్రత్యేక ఆకర్షణగా నిలిచారు.
తండాకు చేరుకున్న ఎమ్మెల్యే ఆదినారాయణకు బంజారా కుల పెద్దలు, స్థానికులు సంప్రదాయబద్ధంగా ఘన స్వాగతం పలికారు. ఈ సందర్భంగా ఆయన బంజారాల సాంప్రదాయ తలపాగాను ధరించి, గిరిజనులలో ఒకరిగా మారిపోయారు. బంజారా యువతీ యువకులు, తండావాసులతో కలిసి ఎమ్మెల్యే ఉత్సాహంగా అడుగులేస్తూ, డ్యాన్స్ చేసి స్థానికుల్లో సరికొత్త జోష్ నింపారు.
అనంతరం పండుగ సందర్భంగా ఏర్పాటు చేసిన ప్రత్యేక పూజా కార్యక్రమాల్లో ఎమ్మెల్యే పాల్గొన్నారు. దుర్గాభవానీ అమ్మవారిని దర్శించుకుని, గ్రామ ప్రజలు పాడిపంటలతో, ఆయురారోగ్యాలతో వర్ధిల్లాలని మొక్కులు చెల్లించుకున్నారు. మన గిరిజన సంస్కృతీ సాంప్రదాయాలు ఎంతో విశిష్టమైనవని, తరతరాలుగా వస్తున్న ఈ పండుగలను, ఆచారాలను కాపాడుకోవాల్సిన బాధ్యత మనందరిపై ఉందని ఈ సందర్భంగా ఎమ్మెల్యే పేర్కొన్నారు. తండా ప్రజలందరికీ, బంజారా సోదరసోదరీమణులకు తీజ్ పండుగ శుభాకాంక్షలు తెలియజేశారు. ఈ వేడుకల్లో స్థానిక బంజారా కుల పెద్దలు, ప్రజాప్రతినిధులు, యువకులు, పెద్ద సంఖ్యలో తండావాసులు పాల్గొని కార్యక్రమాన్ని విజయవంతం చేశారు.
