కలం, ఖమ్మం బ్యూరో : కలకలలాడే గోదావరి తీరం… సూర్యోదయపు అరుణ కిరణాలు రామాలయ గోపురాన్ని స్పృశిస్తున్న పవిత్ర సమయం. ఆ సుందర దృశ్యాల నడుమ భద్రాద్రి ధామం (Bhadrachalam) మంగళ వాయిద్యాల ధ్వనులతో, వేద పండితుల మంత్రోచ్ఛారణలతో మార్మోగిపోయింది. పొలాల్లో నాట్లు వేసి, కారుమేఘాల రాక కోసం నింగి వైపు ఆశగా చూస్తున్న రైతన్నల కళ్లల్లో ధైర్యాన్ని నింపేందుకు, భూతల్లిని పచ్చని పైర్లతో పరవశింపజేసేందుకు వైదిక లోకం భద్రాచల క్షేత్రంలో ఒక మహా యజ్ఞానికి శ్రీకారం చుట్టింది. తెలంగాణ ప్రభుత్వ దేవాదాయ శాఖ, ఆలయ వైదిక కమిటీల ఆధ్వర్యంలో తొలి ఏకాదశి పర్వదినాన “శ్రీరామాత్మక వరుణ యాగం (వైయూహి కేష్టి)” అంగరంగ వైభవంగా ప్రాణప్రతిష్ఠ పోసుకుంది.
యాగశాల మామిడాకుల తోరణాలు, ధూపదీప నైవేద్యాల సువాసనలతో నిండిపోగా… పాంచరాత్రాగమ శాస్త్ర నిబంధనలను అనుసరిస్తూ వేద పండితులు యజ్ఞాన్ని ప్రారంభించారు. యాగశాల మధ్యలో దివ్యంగా వెలిగిపోతున్న నాలుగు పవిత్ర కలశాలలోకి వాసుదేవ, సంకర్షణ, ప్రద్యుమ్న, అనిరుద్ధ అనే చతుర్వ్యూహ మూర్తులను భక్తిశ్రద్ధలతో ఆవాహన చేశారు. ఎగిసిపడే అగ్నికీలలకు నవధాన్యాలు, హవిస్సులు సమర్పిస్తూ… మూల రామాయణంలోని పవిత్ర సంక్షేప రామాయణ శ్లోకాలకు వరుణ సంపుటి మంత్రాలను జోడించి పండితులు హోమ క్రతువును నడిపించారు. శ్రీరాముడి ఆజ్ఞకు ప్రకృత్యంతటా శిరస్సు వంచుతుందనే నమ్మకానికి ప్రతీకగా ఆకాశం కరిగేలా సాగిన ఈ వేద ఘోష భక్తులలో పవిత్ర పులకింతను నింపింది.
యాగ సంప్రదాయంలో భాగంగా, హోమ గుండం నుండి సేకరించిన పవిత్ర సంపాతాజ్యాన్ని, యాగ కలశాల దివ్య తీర్థాన్ని స్వీకరించి శ్రీ సీతారామచంద్ర స్వామివారికి మహా అభిషేకం నిర్వహించారు. ఈ అపూర్వ ఘట్టాన్ని కళ్లారా చూసిన వేలాది మంది భక్తులు “రామయ్య తండ్రీ… మా పొలాలు పచ్చగా పండాలి, వరుణ దేవుడు కరుణించాలి” అంటూ వేడుకున్నారు. మన పురాణాల ప్రకారం వర్షాభావ పరిస్థితులు నెలకొన్నప్పుడు వరుణ యాగం, వరుణ జపంతో పాటు విరాట పర్వ పారాయణం చేయడం వల్ల అనావృష్టి తొలగి సమృద్ధిగా వర్షాలు కురుస్తాయనేది శతాబ్దాల నాటి నమ్మకం.
మహాభారతంలో పాండవులు విరాటరాజు వద్ద ఉన్నప్పుడు ఆ రాజ్యం పాడిపంటలతో సుభిక్షంగా మారినట్లే, ఈ శ్రీరామాత్మక వరుణ యాగం ఫలితంగా రాష్ట్రవ్యాప్తంగా సకాలంలో పుష్కలంగా వర్షాలు కురిసి, జలాశయాలన్నీ నిండాలని అర్చక స్వాములు ఆకాంక్షించారు. యజ్ఞ గుండం నుండి వెలువడిన పవిత్ర ధూపం ఆకాశంలోకి ఎగిసి, త్వరలోనే కారుమేఘాలై ఊరూరా వర్షధారలుగా కురుస్తుందనే బలమైన నమ్మకంతో భక్తజనం రామయ్య దివ్య ఆశీస్సులతో ఇళ్లకు పయనమయ్యారు.
