కలం, వెబ్డెస్క్: భారత బాక్సర్ సచిన్ సివాచ్ (Sachin Siwach) కామన్వెల్త్ గేమ్స్లో విజయంతో బోణీ కొట్టాడు. ఉత్కంఠభరిత పోరులో కెనడాకు చెందిన కియోమా అల్-అహ్మదియెహ్ను 4-1తో ఓడించి చివరి-16లోకి చేరాడు. స్కాటిష్ ఈవెంట్ క్యాంపస్లో శనివారం ఈ పోరు జరిగింది. తొలి రౌండ్ నుంచే ఇద్దరూ దూకుడుగా ఆడారు. రింగ్ మధ్యలో పంచ్ల వర్షం కురిపించారు. అయితే సచిన్ కచ్చితమైన పంచ్లతో ఆధిక్యం సాధించాడు. ముగ్గురు జడ్జీలు తొలి రౌండ్ను 10-9తో సచిన్కే ఇచ్చారు.
రెండో రౌండ్లో కెనడా బాక్సర్ మరింత దూకుడుగా కనిపించాడు. అయినా సచిన్ ప్రశాంతంగా ఆడాడు. సరైన సమయంలో కౌంటర్ అటాక్లు చేశాడు. అతని ప్రదర్శనకు ఐదుగురు జడ్జీలు ఏకగ్రీవంగా మద్దతు ఇచ్చారు. రెండో రౌండ్ మొత్తం సచిన్ ఖాతాలో పడింది. చివరి రౌండ్లో కెనడా బాక్సర్ చివరి ప్రయత్నం చేశాడు. సచిన్ మాత్రం అనవసర రిస్క్ తీసుకోలేదు. స్కోరులో ఉన్న ఆధిక్యాన్ని కాపాడుకుంటూ తెలివిగా మ్యాచ్ను ముగించాడు.
చివరి రౌండ్ను ముగ్గురు జడ్జీలు కెనడా బాక్సర్కు ఇచ్చినా, మొత్తం ఫలితం సచిన్కే అనుకూలంగా నిలిచింది. ఈ విజయంతో సచిన్ ప్రీక్వార్టర్స్కు చేరాడు. తదుపరి మ్యాచ్లో ఇంగ్లండ్కు చెందిన విల్ హెవిట్తో తలపడనున్నాడు. ఈ పోరు సోమవారం జరగనుంది. గ్లాస్గో కామన్వెల్త్ గేమ్స్లో తదుపరి దశకు చేరిన రెండో భారత బాక్సర్గా సచిన్ నిలిచాడు. అంతకుముందు 55 కేజీల విభాగంలో జదుమణి సింగ్ మండెంగ్బామ్ కూడా విజయం సాధించాడు.
ఈసారి కామన్వెల్త్ గేమ్స్లో భారత్ 14 మంది బాక్సర్లతో బరిలోకి దిగింది. వీరిలో ఏడుగురు పురుషులు, ఏడుగురు మహిళలు ఉన్నారు. మరోవైపు ఒలింపిక్ పతక విజేత లవ్లీనా బోర్గొహైన్ నేరుగా సెమీఫైనల్కు చేరుకుంది. కామన్వెల్త్ గేమ్స్ నిబంధనల ప్రకారం సెమీఫైనల్లో ఓడిన ఇద్దరికీ కాంస్య పతకం లభిస్తుంది. దీంతో లవ్లీనాకు కనీసం ఒక పతకం ఖాయమైంది.
