అన్‌బీటెన్ ఆస్ట్రేలియా.. ఏడోసారి విశ్వవిజేతగా రికార్డు

క‌లం, వెబ్ డెస్క్‌: మహిళల టీ20 ప్రపంచకప్‌ (Women T20 World Cup)లో డిఫెండింగ్ ఛాంపియన్ ఆస్ట్రేలియా (Australia) మరోసారి గర్జించింది. లండన్‌లోని లార్డ్స్ మైదానంలో ఆతిథ్య ఇంగ్లండ్‌ను ఫైనల్లో ఘోరంగా ఓడించింది. ఇంగ్లండ్ ఇచ్చిన 151 పరుగుల లక్ష్యాన్ని ఆసీస్ సులువుగా ఛేదించింది. కేవలం 17.1 ఓవర్లలోనే 3 వికెట్లు కోల్పోయి 153 పరుగులు సాధించింది. ఈ విజయంతో ఆస్ట్రేలియా మరోసారి ప్రపంచ ఛాంపియన్‌గా నిలిచింది. ఇంగ్లండ్ బౌలర్లను ఆసీస్ బ్యాటర్లు మైదానం నలుమూలలా ఇష్టమొచ్చినట్లు బాదారు.

టాస్ ఓడి మొదట బ్యాటింగ్ చేసిన ఇంగ్లండ్‌కు ఆరంభంలోనే గట్టి షాక్‌లు తగిలాయి. ఓపెనర్ అమీ జోన్స్ 6 బంతుల్లో ఒక ఫోర్‌తో 6 పరుగులు మాత్రమే చేసింది. లూసీ హామిల్టన్ బౌలింగ్‌లో ఆమె అవుట్ అయింది. మరో ఓపెనర్ డానీ వ్యాట్-హాడ్జ్ 9 బంతుల్లో ఒక ఫోర్‌తో 8 పరుగులు చేసి వెనుతిరిగింది. అన్నాబెల్ సదర్‌లాండ్ బౌలింగ్‌లో బెత్ మూనే ఆమె క్యాచ్ పట్టింది. వన్ డౌన్ బ్యాటర్ అలైస్ క్యాప్సే 20 బంతుల్లో 2 ఫోర్లు, ఒక సిక్సర్‌తో 23 పరుగులు చేసింది. ఆమెను సోఫీ మోలిన్యూక్స్ బౌల్డ్ చేసింది. సీనియర్ ప్లేయర్ హీథర్ నైట్ 6 బంతుల్లో 2 పరుగులు చేసి కిమ్ గార్త్ బౌలింగ్‌లో ఎల్బీడబ్ల్యూ అయింది.

ఈ దశలో ఇంగ్లండ్ 70 పరుగులకే 4 వికెట్లు కోల్పోయి తీవ్ర కష్టాల్లో పడింది. అప్పుడు కెప్టెన్ నాట్ స్కివర్ బ్రంట్ బాధ్యతాయుతంగా ఆడింది. ఆమె 53 బంతుల్లో 5 ఫోర్లతో అజేయంగా 58 పరుగులు చేసింది. ఆఖర్లో ఫ్రేయ కెంప్ ఆమెకు తోడై వేగంగా ఆడింది. కెంప్ 28 బంతుల్లో 4 ఫోర్లు, ఒక సిక్సర్‌తో అజేయంగా 44 పరుగులు రాబట్టింది. వీరిద్దరి ఐదో వికెట్ భాగస్వామ్యం వల్లే ఇంగ్లండ్ 20 ఓవర్లలో 4 వికెట్లకు 150 పరుగులు చేయగలిగింది. ఆసీస్ బౌలర్లలో కిమ్ గార్త్ 4 ఓవర్లలో 20 పరుగులు ఇచ్చి ఒక వికెట్ తీసింది. లూసీ హామిల్టన్ 3 ఓవర్లలో 19 పరుగులకు ఒక వికెట్ పడగొట్టింది. సోఫీ మోలిన్యూక్స్ 4 ఓవర్లలో 32 పరుగులకు ఒక వికెట్ సాధించింది. అన్నాబెల్ సదర్‌లాండ్ 4 ఓవర్లలో 34 పరుగులకు ఒక వికెట్ తీసుకుంది. జార్జియా వేర్‌హామ్ 2 ఓవర్లలో 9 పరుగులు, యాష్లే గార్డనర్ 3 ఓవర్లలో 32 పరుగులు ఇచ్చినా వికెట్లు దక్కలేదు.

ఆ తర్వాత 151 పరుగుల టార్గెట్‌తో ఆస్ట్రేలియా బ్యాటింగ్ ప్రారంభించింది. ఓపెనర్ జార్జియా వోల్ 6 బంతుల్లో 2 ఫోర్లతో 9 పరుగులు చేసింది. లారెన్ బెల్ బౌలింగ్‌లో ఆమె బౌల్డ్ అయింది. అప్పుడు ఆసీస్ స్కోరు 17 పరుగులు మాత్రమే. కానీ ఆ తర్వాత ఇంగ్లండ్ బౌలర్లకు చుక్కలు కనిపించాయి. మరో ఓపెనర్ బెత్ మూనే 49 బంతుల్లో 10 ఫోర్లతో 64 పరుగులు చేసింది. సోఫీ ఎక్లెస్టోన్ బౌలింగ్‌లో ఆమె ఎల్బీడబ్ల్యూగా వెనుతిరిగింది. వన్ డౌన్ బ్యాటర్ ఫోబీ లిచ్‌ఫీల్డ్ 35 బంతుల్లో 6 ఫోర్లు, 2 సిక్సర్లతో 48 పరుగులు చేసింది. చార్లీ డీన్ బౌలింగ్‌లో ఆమె బౌల్డ్ అయింది. మూనే, లిచ్‌ఫీల్డ్ రెండో వికెట్‌కు ఏకంగా 100 పరుగులు జోడించి ఇంగ్లండ్ ఆశలను దెబ్బతీశారు.

చివర్లో ఎల్లీస్ పెర్రీ 12 బంతుల్లో 2 ఫోర్లతో 13 పరుగులు చేసి నాటౌట్‌గా నిలిచింది. యాష్లే గార్డనర్ 2 బంతుల్లో 3 పరుగులు చేసి ఆమెతో కలిసి మ్యాచ్ ముగించింది. ఇంగ్లండ్ బౌలర్లలో చార్లీ డీన్ 4 ఓవర్లలో 28 పరుగులకు ఒక వికెట్ తీసింది. లారెన్ బెల్ 3 ఓవర్లలో 38 పరుగులకు ఒక వికెట్ పడగొట్టింది. సోఫీ ఎక్లెస్టోన్ 3.1 ఓవర్లలో 24 పరుగులకు ఒక వికెట్ సాధించింది. లిన్సే స్మిత్ 4 ఓవర్లలో 30 పరుగులు, ఫ్రేయ కెంప్ 2 ఓవర్లలో 22 పరుగులు ఇచ్చారు. డాని గిబ్సన్ ఒక ఓవర్ వేసి 7 పరుగులు ఇచ్చింది. కానీ వీరికి వికెట్లు దక్కలేదు. టోర్నీ అంతటా అద్భుతంగా ఆడిన ఆస్ట్రేలియా మరోసారి కప్‌ను గెలుచుకోగా ఇంగ్లండ్ రన్నరప్‌తో సరిపెట్టుకోవాల్సి వచ్చింది.