క‌లం, స్పోర్ట్స్‌: టెన్నిస్‌ స్టార్‌ స్విటోలినా (Elina Svitolina) తన వివాహ బంధానికి స్వస్తి పలుకుతున్నారు. ఫ్రెంచ్‌ టెన్నిస్‌ ఆటగాడు గేల్‌ మోన్‌ఫిల్స్‌తో విడిపోతున్నట్లు ప్రకటించారు. ఉక్రెయిన్‌ యుద్ధం తన మానసిక, భావోద్వేగ ఆరోగ్యంపై తీవ్ర ప్రభావం చూపిందని వెల్లడించారు. ఇప్పుడు భార్యగా, తల్లిగా, క్రీడాకారిణిగా ఉన్న పాత్రలకు అతీతంగా తనను తాను తిరిగి తెలుసుకోవాల్సిన అవసరం ఉందని తెలిపారు. స్విటోలినా, మోన్‌ఫిల్స్‌ 2021 జూలైలో వివాహం చేసుకున్నారు. 2022 అక్టోబర్‌లో వీరికి కుమార్తె స్కాయే జన్మించింది. కష్టకాలంలో మోన్‌ఫిల్స్‌ తనకు అండగా నిలిచారని స్విటోలినా గుర్తుచేసుకున్నారు. అయితే, తనలో జరుగుతున్న పోరాటాన్ని ప్రేమ ఒక్కటే పరిష్కరించలేదని వివరించారు.
తమ బంధం ముగుస్తున్నా, కుటుంబం మాత్రం కొనసాగుతుందని స్విటోలినా స్పష్టం చేశారు. కుమార్తె స్కాయే తమ ఇద్దరికీ తొలి ప్రాధాన్యమని తెలిపారు. ఆమె జీవితంలోని ప్రతి దశలోనూ తల్లిదండ్రులుగా అండగా ఉంటామని పేర్కొన్నారు. తమ విడిపోవడానికి ఎవరూ కారణం కాదని స్పష్టం చేశారు. 2025లో స్విటోలినా టెన్నిస్‌ నుంచి ముందుగానే విరామం తీసుకున్నారు. ఏడాది పొడవునా ఎదురైన ఒత్తిడి నుంచి కోలుకునేందుకు సమయం కేటాయించారు. తాజాగా తన వ్యక్తిగత జీవితంపై ఈ ప్రకటన చేశారు. మరోవైపు, మోన్‌ఫిల్స్‌ ప్రొఫెషనల్‌ టెన్నిస్‌కు వీడ్కోలు పలికారు. తమ కుటుంబంలో చోటుచేసుకుంటున్న మార్పులను అర్థం చేసుకోవాలని స్విటోలినా కోరారు.
