కలం, వెబ్‌డెస్క్: కడప జిల్లా ప్రొద్దుటూరు (Proddatur)లో నామినేషన్ల పరిశీలన కేంద్రం వద్ద ఉద్రిక్త పరిస్థితులు నెలకొన్నాయి. అభ్యర్థులను కేంద్రంలోకి అనుమతించాలంటూ వైసీపీ నాయకులు ఆందోళనకు దిగడంతో అక్కడ కొంతసేపు హైటెన్షన్ వాతావరణం ఏర్పడింది. ఈ క్రమంలో పోలీసులు, వైసీపీ కార్యకర్తల మధ్య వాగ్వాదం చోటుచేసుకున్నట్లు సమాచారం.
నామినేషన్ల పరిశీలన ప్రక్రియ కొనసాగుతున్న సమయంలో తమ అభ్యర్థులను లోపలికి పంపించాలని కోరుతూ మాజీ ఎమ్మెల్యే రాచమల్లు శివప్రసాద్ రెడ్డి (Former MLA Rachamallu Siva Prasad Reddy) నిరసనకు దిగారు. రోడ్డుపై బైఠాయించి తన నిరసనను వ్యక్తం చేశారు. వైసీపీ చైర్మన్ అభ్యర్థి నరసింహారెడ్డి సైతం ఆందోళనలో పాల్గొన్నట్లు తెలిసింది. తమ అభ్యర్థులకు అవకాశం కల్పించాలని వైసీపీ నేతలు డిమాండ్ చేశారు.
ఈ నేపథ్యంలో పరిస్థితిని అదుపులోకి తీసుకురావడానికి పోలీసులు ప్రయత్నించగా ఉద్రిక్తత మరింత పెరిగినట్లు సమాచారం. ఆందోళన చేస్తున్న వైసీపీ నాయకులు, కార్యకర్తలపై పోలీసులు లాఠీచార్జ్ చేసినట్లు తెలిసింది. దీంతో కార్యకర్తలు పోలీసులకు వ్యతిరేకంగా నినాదాలు చేశారు. ఈ పరిణామాలతో నామినేషన్ల పరిశీలన కేంద్రం పరిసరాల్లో ఉద్రిక్త వాతావరణం నెలకొంది. ఘటనకు సంబంధించిన పూర్తి వివరాలు, అధికారుల స్పందన తెలియాల్సి ఉంది. పరిస్థితులు సాధారణ స్థితికి తీసుకువచ్చేందుకు పోలీసులు చర్యలు చేపట్టినట్లు సమాచారం.
