కలం, స్పోర్ట్స్: న్యూజిలాండ్‌తో రెండో టీ20కి ముందు టీమిండియాకు ఎదురుదెబ్బ తగిలింది. వికెట్ కీపర్ బ్యాటర్ ఇషాన్ కిషన్ (Ishan Kishan) గాయం (Injury) తో ఈ మ్యాచ్‌కు దూరమయ్యాడు. దీంతో యువ బ్యాటర్ వైభవ్ సూర్యవంశీకి జట్టులో చోటు దక్కే అవకాశాలు పెరిగాయి. తొలి టీ20లో ఇషాన్ కుడి తొడ కండరానికి గాయమైంది. దీంతో అతడిని మూడో స్థానంలో కాకుండా ఐదో స్థానంలో బ్యాటింగ్‌కు పంపించారు. అతడి స్థానంలో తిలక్ వర్మ మూడో స్థానంలో ఆడాడు. ఈ విషయాన్ని బ్యాటింగ్ కోచ్ సితాన్షు కోటక్ వెల్లడించాడు. తొలుత ఇషాన్ రెండో టీ20 ఆడటంపై సందేహాలు మాత్రమే ఉండేవి.
అయితే, శుక్రవారం బీసీసీఐ అధికారిక ప్రకటన విడుదల చేసింది. కుడి తొడ కండరానికి స్వల్ప గాయం కావడంతో ఇషాన్ ఈ మ్యాచ్‌కు దూరమైనట్లు తెలిపింది. అతడి కోలుకునే పరిస్థితిని వైద్య బృందం పర్యవేక్షిస్తోందని పేర్కొంది. ఇషాన్ స్థానంలో వైభవ్ సూర్యవంశీకి అవకాశం ఉందా అనే ప్రశ్నకు కొటక్ సానుకూలంగా స్పందించాడు. ఇషాన్ పూర్తిగా కోలుకోకపోతే వైభవ్‌ను ఎంపిక చేసే అవకాశం ఉందని తెలిపాడు. అతడు జట్టులోకి వచ్చే బలమైన పోటీదారుల్లో ఒకడని స్పష్టం చేశాడు.
అయితే, భారత జట్టులో ఓపెనర్లుగా అభిషేక్ శర్మ, సంజూ శాంసన్ నిలకడగా రాణిస్తున్నారు. అందుకే వైభవ్‌కు ఇప్పటివరకు తుది జట్టులో ఎక్కువ అవకాశాలు రాలేదు. కెప్టెన్ శ్రేయస్ అయ్యర్ కూడా జట్టు ఎంపిక విషయంలో ఓపెనర్ల ప్రదర్శనను పరిగణనలోకి తీసుకుంటున్నట్లు గతంలో తెలిపాడు. ఇప్పుడు ఇషాన్ దూరం కావడంతో జట్టు కూర్పులో మార్పు తప్పనిసరి అయింది.
