కలం, వెబ్ డెస్క్: కుల గణనపై సీఎం రేవంత్ రెడ్డి (CM Revanth Reddy) కీలక ప్రకటన చేశారు. ఇంకా లెక్కల్లోని రాని బీసీలు ఎవరైనా ఉంటే వెంటనే ప్రభుత్వానికి వివరాలు అందించాలని సూచించారు. అవసరమైతే లెక్కలను మరోసారి సవరిస్తామన్నారు. ఏ వర్గానికి అన్యాయం జరగొద్దనేదే తమ ప్రభుత్వం ఆలోచన అన్నారు.
త్వరలోనే ఈ అంశంపై రాష్ట్ర కేబినెట్‌లో చర్చించి నిర్ణయం తీసుకుంటామన్నారు. రవీంద్ర భారతిలో జరుగుతున్న పండుగ సాయన్న జయంతి వేడుకల్లో పాల్గొన్న సీఎం రేవంత్ ఈ మేరకు ప్రకటన చేశారు. స్వాతంత్య్రం వచ్చాక ఎవరూ కుల గణన చేయలేదని.. తెలంగాణలో తమ ప్రభుత్వమే ఆ పని చేసిందన్నారు.
ముదిరాజ్‌లు అండగా ఉంటే..
ముదిరాజ్ జాతి గొప్పదని.. వారు అండగా ఉంటే ఎలాంటి అడ్డంకి అయినా అధిగమించవచ్చని సీఎం రేవంత్ రెడ్డి అన్నారు. తాను ప్రాతినిధ్యం వహిస్తున్న కొడంగల్ నియోజకవర్గంలో అత్యధిక జనాభా ముదిరాజ్ కులస్థులే అన్నారు. అలాంటి వారి ఆరాధ్య దైవం లాంటి పండుగ సాయన్న జయంతిని అధికారికంగా నిర్వహించాలని గత ప్రభుత్వాలు ఆలోచించలేదన్నారు.
మంత్రి వాకిటి శ్రీహరి తనకు ఈ విషయం చెప్పగానే.. వెంటనే నిర్వహించాలని ఆదేశించామన్నారు. భూస్వాములపై పోరాటం చేసి వారి సంపదను పేదలకు పంచిన గొప్ప వీరుడు పండుగ సాయన్న అన్నారు. చివరికి ఆయన్ను ఉరి తీశారని.. వందేళ్లయినా సాయన్న త్యాగాన్ని మనం గుర్తు చేసుకుంటున్నామని కొనియాడారు.
