కలం, నాగర్ కర్నూల్: విజయదశమి పర్వదినాన్ని పురస్కరించుకుని.. తెలంగాణ రాష్ట్ర ముఖ్యమంత్రి రేవంత్ రెడ్డి (CM Revanth Reddy) మంగళవారం తన స్వగ్రామమైన నాగర్‌కర్నూల్ జిల్లా వంగూరు మండలం కొండారెడ్డిపల్లిలో(Kondareddypalli) కుటుంబ సభ్యులతో కలిసి సంప్రదాయబద్ధంగా దసరా వేడుకల్లో పాల్గొన్నారు. స్వగ్రామానికి చేరుకున్న ముఖ్యమంత్రికి ప్రజాప్రతినిధులు, జిల్లా ఉన్నతాధికారులు, గ్రామస్థులు ఘన స్వాగతం పలికారు. గ్రామమంతా పండుగ వాతావరణం నెలకొనగా, ముఖ్యమంత్రి పర్యటన స్థానికుల్లో ఉత్సాహాన్ని నింపింది.
హెలికాప్టర్ ద్వారా రాక.. ప్రజాప్రతినిధుల ఘన స్వాగతం
హైదరాబాద్ నుంచి ప్రత్యేక హెలికాప్టర్‌లో కొండారెడ్డిపల్లికి చేరుకున్న ముఖ్యమంత్రి రేవంత్ రెడ్డికి నాగర్‌కర్నూల్ పార్లమెంట్ సభ్యులు డాక్టర్ మల్లు రవి, అచ్చంపేట ఎమ్మెల్యే డాక్టర్ వంశీకృష్ణ, కల్వకుర్తి ఎమ్మెల్యే కసిరెడ్డి నారాయణరెడ్డి, నాగర్‌కర్నూల్ ఎమ్మెల్యే డాక్టర్ కూచుకుళ్ల రాజేష్ రెడ్డి, దేవరకద్ర ఎమ్మెల్యే మధుసూదన్ రెడ్డి, దేవరకొండ ఎమ్మెల్యే బాలు నాయక్, ఎమ్మెల్సీ శంకర్ నాయక్, జిల్లా కలెక్టర్ ఆదర్శ్ సురభి, జిల్లా ఎస్పీ డాక్టర్ సంగ్రామ్ సింగ్ జీ పాటిల్, అచ్చంపేట సబ్ కలెక్టర్ సలోని చాబ్రా, అదనపు కలెక్టర్లు బి. చెన్నయ్య, దేవ సహాయం తదితరులు స్వాగతం పలికారు. అనంతరం ముఖ్యమంత్రి ఓపెన్‌టాప్ జీపులో గ్రామంలోకి బయలుదేరారు. మార్గమధ్యంలో గ్రామస్థులు, మహిళలు, అభిమానులు సంప్రదాయ పద్ధతుల్లో స్వాగతం పలుకుతూ దసరా శుభాకాంక్షలు తెలియజేశారు.
డప్పు చప్పుళ్లు, పూల జల్లులతో స్వాగతం
ముఖ్యమంత్రి గ్రామంలోకి ప్రవేశించగానే గ్రామస్థులు డప్పు చప్పుళ్లు, గజమాలలు, పూల జల్లులతో ఘనంగా స్వాగతం పలికారు. మహిళలు సంప్రదాయ బతుకమ్మలతో వేడుకలకు ప్రత్యేక శోభ తీసుకొచ్చారు. గ్రామీణ సంస్కృతి, తెలంగాణ సంప్రదాయాలు ప్రతిబింబించేలా స్వాగత కార్యక్రమాలు నిర్వహించారు. ఓపెన్‌టాప్ జీపులో ప్రయాణిస్తూ ముఖ్యమంత్రి గ్రామ ప్రజలకు, చిన్ననాటి మిత్రులకు, అభిమానులకు అభివాదం చేశారు. గ్రామ పెద్దలు, స్థానికులతో ఆప్యాయంగా మాట్లాడి వారి పలకరింపులకు స్పందించారు. పండుగ వేళ తమ మధ్యకు వచ్చిన ముఖ్యమంత్రిని చూసి గ్రామస్థులు ఆనందం వ్యక్తం చేశారు.
శ్రీ ఆంజనేయ స్వామివారి ఆలయంలో ప్రత్యేక పూజలు
గ్రామానికి చేరుకున్న అనంతరం ముఖ్యమంత్రి రేవంత్ రెడ్డి కుటుంబ సభ్యులతో కలిసి స్థానిక శ్రీ ఆంజనేయ స్వామివారి దేవస్థానాన్ని సందర్శించారు. ఆలయానికి చేరుకున్న ముఖ్యమంత్రికి వేద పండితులు పూర్ణకుంభంతో, మంత్రోచ్ఛారణల నడుమ సంప్రదాయబద్ధంగా స్వాగతం పలికారు. అనంతరం ముఖ్యమంత్రి కుటుంబ సభ్యులతో కలిసి స్వామివారిని దర్శించుకుని ప్రత్యేక పూజలు నిర్వహించారు. వేద పండితులు ముఖ్యమంత్రి, ఆయన కుటుంబ సభ్యులకు ఆశీర్వచనాలు అందజేసి తీర్థప్రసాదాలు సమర్పించారు. రాష్ట్ర ప్రజలందరికీ సుఖసంతోషాలు, ఆయురారోగ్యాలు, శాంతి సౌభాగ్యాలు కలగాలని ముఖ్యమంత్రి స్వామివారిని ప్రార్థించారు.
కొట్ట మైసమ్మ ఆలయంలో ప్రత్యేక పూజలు
నాగర్ కర్నూల్ జిల్లా కొండారెడ్డిపల్లి గ్రామంలో ముఖ్యమంత్రి రేవంత్ రెడ్డి తన కుటుంబ సభ్యులతో కలిసి కొట్ట మైసమ్మ దేవాలయాన్ని సందర్శించి ప్రత్యేక పూజలు నిర్వహించారు. ఈ సందర్భంగా ఆలయ పూజారులు సంప్రదాయబద్ధంగా పూజా కార్యక్రమాలను నిర్వహించారు.
జెమ్మి చెట్టుకు శాస్త్రోక్తంగా పూజలు
విజయదశమి వేడుకల్లో భాగంగా ముఖ్యమంత్రి జెమ్మి చెట్టుకు సంప్రదాయబద్ధంగా పూజలు నిర్వహించారు. దసరా పండుగలో విశిష్ట ప్రాధాన్యం కలిగిన జెమ్మి పూజను శాస్త్రోక్తంగా నిర్వహించారు. ఈ కార్యక్రమంలో ప్రజాప్రతినిధులు, గ్రామస్థులు, స్థానిక ప్రముఖులు పాల్గొన్నారు. అనంతరం ముఖ్యమంత్రి రాష్ట్ర ప్రజలకు విజయదశమి శుభాకాంక్షలు తెలియజేశారు.
గ్రామస్థులు, చిన్ననాటి మిత్రులతో ఆత్మీయ పలకరింపులు
దసరా వేడుకల సందర్భంగా ముఖ్యమంత్రి తన చిన్ననాటి మిత్రులు, గ్రామ పెద్దలు, స్థానిక ప్రజలతో ఆత్మీయంగా ముచ్చటించారు. వారి యోగక్షేమాలను అడిగి తెలుసుకున్నారు. స్వగ్రామంతో తనకున్న అనుబంధాన్ని చాటుతూ గ్రామస్థులతో స్నేహపూర్వకంగా గడిపారు. కుటుంబ సభ్యులతో కలిసి స్వగ్రామంలో విజయదశమి వేడుకల్లో పాల్గొనడం, ఆలయంలో ప్రత్యేక పూజలు నిర్వహించడం, జెమ్మి పూజలో భాగస్వామి కావడం, గ్రామస్థులతో ఆత్మీయంగా మెలగడం ముఖ్యమంత్రి పర్యటనలో ప్రధాన ఆకర్షణగా నిలిచాయి.
సంప్రదాయాలకు ప్రతీకగా విజయదశమి వేడుకలు
తెలంగాణ సంస్కృతి, సంప్రదాయాల్లో విజయదశమి పండుగకు విశిష్ట స్థానం ఉంది. కుటుంబ అనుబంధాలు, ఆధ్యాత్మిక విశ్వాసాలు, గ్రామీణ జీవన విధానాన్ని ప్రతిబింబించేలా కొండారెడ్డిపల్లిలో దసరా వేడుకలు సంప్రదాయబద్ధంగా కొనసాగాయి. ముఖ్యమంత్రి పర్యటన సందర్భంగా ప్రజాప్రతినిధులు, జిల్లా అధికారులు, గ్రామస్థులు కార్యక్రమాల్లో పాల్గొన్నారు. స్వగ్రామంలో కుటుంబ సభ్యులతో కలిసి పండుగను జరుపుకున్న రేవంత్ రెడ్డి రాష్ట్ర ప్రజలందరికీ విజయదశమి శుభాకాంక్షలు తెలియజేస్తూ, ఈ పండుగ ప్రతి ఒక్కరి జీవితాల్లో విజయం, సంతోషం, శాంతి, శ్రేయస్సును తీసుకురావాలని ఆకాంక్షించారు.
