కలం, ఆదిలాబాద్ : ఉద్యాన పంటల (Horticulture Farming ) సాగుతో రైతులు ఆర్థికంగా బలపడాలని, తక్కువ పెట్టుబడితో అధిక లాభాలు గడించేందుకు పువ్వుల సాగు ఎంతో లాభదాయకమని జిల్లా కలెక్టర్ రాజర్షి షా (Rajarshi Shah) అన్నారు. గురువారం మావల మండలం బట్టిసావర్గం శివారులో రైతు బొమ్మల స్వామికి చెందిన పూల తోటను పరిశీలించారు. అనంతరం తలమడుగు మండలం కజ్జర్ల గ్రామ శివారులో కొప్పుల కిరణ్ లకు చెందిన పువ్వుల తోట, టమాటా పంటలను బైక్ పై ప్రయాణించి క్షేత్రస్థాయిలో పరిశీలించారు. ఈ సందర్భంగా పంట కల్టివేషన్ తీరును తిలకించి, రైతులను అభినందించారు.
అనంతరం కలెక్టర్ మాట్లాడుతూ.. ముందస్తు ప్రణాళికతో చేపట్టిన ఈ పువ్వుల సాగు అభినందనీయమన్నారు. ఈ ఎల్ నినో సమయంలో పంట మార్పిడి విధానంపై జూన్, జులై మాసాల్లో గ్రామసభల్లో రైతులకు విస్తృతంగా అవగాహన కల్పించామని ఆయన గుర్తుచేశారు. ప్రస్తుతం ఈ తోటలో ఎటువంటి పంట నష్టాలు లేకుండా మంచి దిగుబడి రావడమే కాకుండా, అయోధ్య నుంచి వచ్చిన ప్రత్యేక ఆర్డర్ల మేరకు అక్కడికి ఫార్వర్డ్ లింకేజీ ద్వారా పువ్వులు ఎగుమతి అవుతుండటం విశేషమన్నారు.
ఒక ఎకరంలో పువ్వుల సాగుకు కేవలం 35 నుంచి 40 వేల వరకు మాత్రమే ఖర్చు అవుతుందని, మార్కెట్లో విక్రయిస్తే దాదాపు 5 టన్నుల వరకు దిగుబడి వచ్చి రూ. 2 లక్షల వరకు ఆదాయం పొందే అవకాశం ఉందని కలెక్టర్ తెలిపారు. తక్కువ నీటి వినియోగం కోసం స్ప్రింక్లర్లు ఏర్పాటు చేశామని, భవిష్యత్తులో డ్రిప్ ఇరిగేషన్ సౌకర్యం కూడా కల్పిస్తామని ఆయన (Rajarshi Shah) స్పష్టం చేశారు.
ప్రస్తుత అక్టోబర్ ఎండల తీవ్రత దృష్ట్యా, సోయాబీన్ హార్వెస్ట్ పూర్తయిన తర్వాత రైతులు వేరుశనగ, మినుము, నువ్వులు వంటి తక్కువ నీరు అవసరమయ్యే స్వల్పకాలిక పంటల వైపు మళ్లాలని సూచించారు. పత్తి తీసిన వెంటనే మళ్లీ జొన్న లేదా పత్తి భూమిలో అదే పద్ధతి కొనసాగిస్తే మార్చి, ఏప్రిల్ వరకు ఇబ్బందులు తలెత్తుతాయని, కాబట్టి ప్రత్యామ్నాయ స్వల్పకాలిక పంటలకే ప్రాధాన్యత ఇవ్వాలని కోరారు.
