కలం, వెబ్ డెస్క్ : ఆంధ్రప్రదేశ్ విద్యాశాఖ మంత్రి నారా లోకేశ్ (Nara Lokesh) ఏపీ టెట్ –2026 (AP TET 2026) నోటిఫికేషన్ విడుదలపై కీలక ప్రకటన చేశారు. రాష్ట్రంలో పాఠశాల విద్యా వ్యవస్థను మరింత బలోపేతం చేయడం, నాణ్యమైన బోధన ప్రమాణాలను పెంపొందించడమే లక్ష్యంగా ఈ పరీక్షను నిర్వహిస్తున్నట్లు తెలిపారు.
టెట్–2026 నోటిఫికేషన్ జూన్ 5న విడుదల కానుండగా, అదే రోజు నుంచి జూలై 5 వరకు దరఖాస్తులు స్వీకరించనున్నట్లు వెల్లడించారు. జూలై 25 నుంచి హాల్ టికెట్లు అందుబాటులో ఉంటాయని, ఆగస్టు 5 నుంచి 21 వరకు పరీక్షలు నిర్వహించనున్నట్లు తెలిపారు. సెప్టెంబర్ 15న ఫలితాలు విడుదల చేస్తామని వివరించారు.
వివరాల కోసం https://tet2dsc.apcfss.in వెబ్సైట్ను సందర్శించవచ్చని సూచించారు. అదేవిధంగా ప్రభుత్వ జాబ్ క్యాలెండర్లో భాగంగా టీచర్ల నియామకాలకు సంబంధించి DSC–2026 నోటిఫికేషన్ అక్టోబర్ 2026లో విడుదల చేయనున్నట్లు మంత్రి లోకేశ్ తెలిపారు. టీచర్ ఉద్యోగాలకు సిద్ధమవుతున్న అభ్యర్థులు, ఉపాధ్యాయులకు శుభాకాంక్షలు తెలియజేశారు.
