కలం డెస్క్ : చత్తీస్గఢ్ (Chhattisgarh) లోని సర్గుజా జిల్లాలోని కెంటే అటవీ ప్రాంతంలో బొగ్గు తవ్వకాలకు (coal mining) ఆ రాష్ట్ర ప్రభుత్వం గ్రీన్ సిగ్నల్ ఇచ్చింది. ఆ రాష్ట్రానికి చెందిన మావోయిస్టు నేత హిడ్మా (Hidma) ఎన్‌కౌంటర్‌లో చనిపోయిన వారం రోజులకే ఆ రాష్ట్ర అటవీ శాఖ కోల్ మైనింగ్ యాక్టివిటీస్ మొదలుపెట్టింది. రాజస్థాన్‌ రాజ్య విద్యుత్ ఉత్పాదన్ నిగమ్ లిమిటెడ్ (RVUNL) అనే కంపెనీకి సర్గుజా జిల్లాలోని 1,760 హెక్టార్ల (4,349 ఎకరాలు) అటవీ భూమిని అప్పగిస్తూ ఆ రాష్ట్ర అటవీ శాఖ కేంద్ర పర్యావరణ మంత్రిత్వశాఖకు ఈ నెల 25న లేఖ రాసింది. రాష్ట్ర అటవీ శాఖ పరిధిలో ఉన్న 1742 హెక్టార్ల అటవీ భూమిని ఇతర అవసరాలకు మళ్ళిస్తూ ఆమోదం తెలిపింది. ఓపెన్ కాస్ట్ (Open cast mining), ఇంటిగ్రేటెడ్ వాషరీ యూనిట్లను ఇక్కడ ఆ కంపెనీ నెలకొల్పనున్నది. ప్రతీ ఏటా సుమారు 9-11 మిలియన్ టన్నుల బొగ్గును ఉత్పత్తి చేయనున్నట్లు చత్తీస్గఢ్ అటవీ శాఖ ఆ లేఖలో పేర్కొన్నది.
ఈ కంపెనీ కోల్ మైనింగ్ కోసం చత్తీస్గఢ్(Chhattisgarh) రాష్ట్ర ప్రభుత్వానికి ఆరేండ్ల క్రితమే విజ్ఞప్తి చేసుకున్నా అప్పటి ముఖ్యమంత్రి భూపేష్ భగేల్ అనుమతి ఇవ్వలేదు. ఆ కంపెనీ రిక్వెస్టును పెండింగ్‌లో పెట్టారు. అటవీ భూమిని కోల్ మైనింగ్‌కు బదిలీ చేయాలన్న ఆలోచనపై అసెంబ్లీలో చర్చ జరిగిన తర్వాత అనుమతి ఇవ్వడానికి ఆ రాష్ట్ర ప్రభుత్వం నిరాకరించింది. ఆ రాష్ట్రంలో రెండేండ్ల క్రితం బీజేపీ ప్రభుత్వం ఏర్పడడంతో మళ్ళీ కదలిక వచ్చింది. ఒకవైపు రాజకీయపరమైన ఇబ్బందులు, మరోవైపు దట్టమైన ‘హస్‌దేవ్ ఆరంద్’ (Hasdeo Arand) అడవుల్లో ఉన్నందున మావోయిస్టు ఉద్యమంతో వచ్చే సమస్యలు.. వీటి కారణంగా ఇంతకాలం మైనింగ్ కార్యకలాపాలకు అటవీ భూమిని ఇతర అవసరాలకు మళ్ళించేలా అనుమతి ఇచ్చేందుకు చత్తీస్గఢ్ ప్రభుత్వం తాత్సారం చేసింది. హిడ్మా ఎన్‌కౌంటర్ తర్వాత వారం రోజులకే అటవీ భూమిని డీనోటిఫై చేస్తూ ఆ రాష్ట్ర ప్రభుత్వం నిర్ణయం తీసుకోవడం గమనార్హం.
Read Also: తెలంగాణ గవర్నర్ బంగళా పేరు మార్పు
Follow Us On: X(Twitter)
