కలం, యాదగిరిగుట్ట : యాదాద్రి శ్రీ లక్ష్మీనరసింహస్వామి వారి క్షేత్రంలో (Yadagirigutta Temple) ఏకాదశి పర్వదినాన్ని పురస్కరించుకుని ఆధ్యాత్మిక వైభవం వెల్లివిరిసింది. స్వామివారికి అత్యంత భక్తిశ్రద్ధలతో ఏకాదశి లక్ష పుష్పార్చన నిర్వహించారు. సుగంధ పరిమళాలు వెదజల్లే పుష్పాలతో సాగిన ఈ విశేష పూజలు ప్రధానాలయంలో భక్తిమయ వాతావరణాన్ని నింపాయి.
పట్టువస్త్రాలు, స్వర్ణాభరణాల అలంకరణ
ప్రధానాలయ ముఖ మండపంలో ఉత్సవమూర్తులను వివిధ రకాల పట్టువస్త్రాలతో పాటు బంగారు, వజ్ర వైఢూర్య ఆభరణాలతో అర్చక స్వాములు దివ్యమనోహరంగా అలంకరించారు. అనంతరం ప్రత్యేక వేదికపై ఉత్సవమూర్తులను అధిష్ఠింపజేసి, శాస్త్రోక్త పూజా విధానాలతో ఆరాధనలు నిర్వహించారు.
పుష్ప పరిమళాల నడుమ లక్ష పుష్పార్చన
పాంచరాత్రాగమ సంప్రదాయాన్ని అనుసరిస్తూ సుగంధభరిత పుష్పాలతో స్వామివారికి లక్ష పుష్పార్చన సమర్పించారు. వేదమంత్రోచ్చారణలు, ఆగమోక్త పూజా విధానాల నడుమ సాగిన ఈ కార్యక్రమం యాదాద్రి ఆలయ (Yadagirigutta Temple) ఆధ్యాత్మిక సంప్రదాయ వైభవాన్ని చాటిచెప్పింది. ఈ విశేష పూజా కార్యక్రమంలో ఆలయ ఈఓ. భవాని శంకర్, ఆలయ అర్చకులు, వేదపండితులు, దేవస్థాన అధికారులు పాల్గొన్నారు.
