కలం, కరీంనగర్ బ్యూరో: విఘ్నాలను తొలగించే లంబోదరుని ఆరాధనకు కరీంనగర్ నగరం సర్వసిద్ధమైంది. గణనాథుడి దివ్య నామస్మరణలు, మంత్రోచ్ఛారణలతో కరీంనగర్లోని ప్రముఖ శ్రీ మహాశక్తి ఆలయం (Karimnagar Mahashakti Temple) భక్తి పారవశ్యంలో మునిగిపోనుంది. శ్రీశ్రీశ్రీ జగద్గురు శంకరాచార్య హంపి విరూపాక్ష విద్యారణ్య పీఠాధిపతులు విద్యారణ్య భారతి స్వామి దివ్యానుగ్రహం, ఆశీస్సులతో గత 16 ఏళ్లుగా ఈ ఆలయంలో గణేశ్ నవరాత్రి ఉత్సవాలను అత్యంత వైభవంగా నిర్వహిస్తున్నారు. ఈ ఏడాది కూడా నవరాత్రి వేడుకలను అంగరంగ వైభవంగా నిర్వహించేందుకు ఆలయ నిర్వాహకులు అన్ని ఏర్పాట్లు పూర్తి చేశారు.
సోమవారం నుండి ఈ నెల 22వ తేదీ వరకు తొమ్మిది రోజుల పాటు ఆలయంలో నిత్య పూజలు, ప్రత్యేక ఆధ్యాత్మిక కార్యక్రమాలు జరగనున్నాయి. ప్రతిరోజూ ఉదయం, సాయంత్రం వేళల్లో జరిగే పూజాదికాలతో ఆలయ ప్రాంగణం భక్తులతో కళకళలాడనుంది. గణనాథుడికి అత్యంత ప్రీతికరమైన మోదకాలను సమర్పిస్తూ ఈసారి ప్రత్యేకంగా 9 రోజుల పాటు సహస్ర మోదక గణపతి హోమం నిర్వహించనున్నారు. కుటుంబ సౌఖ్యం, ఆయురారోగ్యాలు, ఐశ్వర్యం ప్రాప్తించాలని కోరుతూ భక్తులు పెద్ద ఎత్తున ఈ హోమంలో పాల్గొననున్నారు.
16 ఏళ్ల దివ్య సంప్రదాయం..
మహాశక్తి ఆలయంలో ప్రతి ఏటా నిర్వహించే గణేశ్ నవరాత్రులకు ప్రత్యేక స్థానం ఉంది. గత 16 ఏళ్లుగా సంప్రదాయబద్ధంగా సాగుతున్న ఈ వేడుకలు నగర ప్రజలకు గొప్ప ఆధ్యాత్మిక అనుభూతిని అందిస్తున్నాయి. చిన్నారులు, మహిళలు, యువత, వృద్ధులు అనే తేడా లేకుండా సకల జనులు ఈ పూజల్లో పాల్గొని స్వామివారి కృపకు పాత్రులవుతుంటారు.
23న గణేశ్ నిమజ్జనం.. పాల్గొననున్న బండి సంజయ్..
తొమ్మిది రోజుల భక్తి సంబరాల అనంతరం ఈ నెల 23వ తేదీన గణనాథునికి ఘనంగా వీడ్కోలు పలకనున్నారు. ఆ రోజు ఉదయం హోమ గుండంలో పూర్ణాహుతి, ఉత్తర పూజల అనంతరం మధ్యాహ్నం నిర్వహించే ప్రత్యేక హోమ కార్యక్రమంలో కేంద్ర హోంశాఖ సహాయ మంత్రి బండి సంజయ్ కుమార్ పాల్గొననున్నారు. విఘ్న నివారకుడైన గణపతి ఆశీస్సుల కోసం నగరం నలుమూలల నుండి భక్తులు తరలిరావాలని, “గణపతి బప్పా మోరియా” నినాదాల నడుమ సాగే ఈ ఆధ్యాత్మిక ఉత్సవాల్లో భక్తులందరూ పాల్గొని జయప్రదం చేయాలని ఆలయ నిర్వాహకులు సప్రేమగా విజ్ఞప్తి చేశారు.
