క‌లం, స్పోర్ట్స్‌: బంగ్లాదేశ్ మహిళల టీ20 జట్టులో నాయకత్వ మార్పు చోటుచేసుకుంది. ఎడమచేతి వాటం స్పిన్నర్ నహీదా అక్తర్‌కు (Nahida Akter) జట్టు కెప్టెన్సీ బాధ్యతలు అప్పగించారు. ఇప్పటివరకు కెప్టెన్‌గా వ్యవహరించిన వికెట్‌ కీపర్‌ బ్యాటర్‌ నిగర్‌ సుల్తానా ఆ పదవి నుంచి తప్పుకోవడంతో ఈ నిర్ణయం తీసుకున్నారు. నహీదాకు డిప్యూటీగా సోభనా మొస్తరీని నియమించారు. నహీదా నియామకం అనూహ్యంగా జరిగింది కాదు. 2022లో నిగర్‌ సుల్తానా టీ20 కెప్టెన్‌గా బాధ్యతలు చేపట్టినప్పటి నుంచి నహీదా వైస్ కెప్టెన్‌గా కొనసాగుతున్నారు. దాదాపు నాలుగేళ్లపాటు నాయకత్వ బృందంలో పనిచేసిన అనుభవం ఆమెకు ఉంది.
ఈ నేపథ్యంలో టీ20 జట్టును నడిపించే బాధ్యతలు అప్పగించేందుకు ఇదే సరైన సమయమని బంగ్లాదేశ్ క్రికెట్ బోర్డు భావించింది. ఎంపిక కమిటీ సభ్యులతో చర్చించిన తర్వాత ఈ నిర్ణయం తీసుకున్నట్లు బోర్డు మహిళా విభాగం చైర్మన్ రఫీకుల్ ఇస్లాం వెల్లడించారు. జపాన్‌లో జరిగిన ఆసియా క్రీడలు ముగిసిన తర్వాత నిగర్‌ సుల్తానా టీ20 కెప్టెన్సీ నుంచి తప్పుకోవాలని నిర్ణయించుకున్నారు.
కెప్టెన్‌గా నహీదాకు తొలి పరీక్ష త్వరలోనే ఎదురుకానుంది. థాయ్‌లాండ్‌లో జరగనున్న ఐసీసీ మహిళల ఎమర్జింగ్ నేషన్స్ ట్రోఫీలో బంగ్లాదేశ్ పాల్గొననుంది. నవంబర్ 12న పాకిస్థాన్‌తో జరిగే మ్యాచ్‌తో ఆ జట్టు టోర్నీని ప్రారంభిస్తుంది. ఈ టోర్నీతోనే నహీదా కెప్టెన్సీ ప్రయాణం మొదలుకానుంది. అదే సమయంలో వైస్ కెప్టెన్ సోభనా మొస్తరీతో కలిసి నాయకత్వ బాధ్యతలను సమన్వయం చేసుకునే అవకాశం కూడా ఆమెకు లభించనుంది.
