కలం, స్పోర్ట్స్ : లార్డ్స్ మైదానంలో పాకిస్థాన్ ఫాస్ట్ బౌలర్ మొహమ్మద్ అబ్బాస్ (Mohammad Abbas) చరిత్ర సృష్టించాడు. లార్డ్స్ టెస్టులో ఇంగ్లండ్ రెండో ఇన్నింగ్స్లో 5 వికెట్లు తీసి, ఈ ఘనత సాధించిన ఏడో పాకిస్థానీ బౌలర్గా రికార్డు పుస్తకాల్లోకి ఎక్కాడు. ఆగస్టు 30న జరిగిన నాలుగో రోజు ఆటలో ఒల్లీ రాబిన్సన్ను కీపర్ క్యాచ్గా అవుట్ చేసి అబ్బాస్ తన ఐదో వికెట్ను పూర్తి చేసుకున్నాడు.
మొదటి ఇన్నింగ్స్లో 73 పరుగులిచ్చి 4 వికెట్లు తీసిన అబ్బాస్, రెండో ఇన్నింగ్స్లో 57 పరుగులిచ్చి 5 వికెట్లు పడగొట్టాడు. ఈ మ్యాచ్లో అబ్బాస్ మొత్తం 127 పరుగులిచ్చి 9 వికెట్లు సాధించాడు. దీనితో లార్డ్స్ వేదికగా ఒకే టెస్టులో అత్యధిక వికెట్లు తీసిన పాకిస్థాన్ పేసర్గా నిలిచాడు. 1996లో వకార్ యూనిస్ నెలకొల్పిన 8 వికెట్ల రికార్డును అబ్బాస్ అధిగమించాడు. అబ్బాస్ ధాటికి ఇంగ్లండ్ రెండో ఇన్నింగ్స్లో 208 పరుగులకే ఆలౌటైంది. దాంతో పాకిస్థాన్ ముందు 389 పరుగుల భారీ విజ్యలక్ష్యం నమోదైంది.
ఇప్పటివరకు లార్డ్స్లో ఖాన్ మొహమ్మద్, ముదస్సర్ నాజర్, వకార్ యూనిస్, ముస్తాక్ అహ్మద్, మొహమ్మద్ అమీర్, యాసిర్ షాలు మాత్రమే 5 వికెట్ల హాల్ సాధించారు. ఆ దిగ్గజాల సరసన ఇప్పుడు అబ్బాస్ చేరాడు. అంతేకాకుండా లార్డ్స్ గ్రౌండ్లో ఇంగ్లండ్పై అత్యధికంగా 17 వికెట్లు తీసి వకార్ యూనిస్ రికార్డును సమం చేశాడు. ఈ మ్యాచ్లో అబ్బాస్ మరో ఒక్క వికెట్ తీస్తే, లార్డ్స్ మైదానంలో ఇంగ్లండ్పై అత్యధిక వికెట్లు తీసిన ఆసియా బౌలర్గా సరికొత్త చరిత్ర సృష్టిస్తాడు.
