కలం, వెబ్డెస్క్: దాదాపు పదేళ్ల తర్వాత మలేషియా గ్రాండ్ ప్రిక్స్ (Malaysia Grand Prix) మళ్లీ ఎఫ్1 క్యాలెండర్లో చోటు దక్కించుకునే అవకాశం కనిపిస్తోంది. బహ్రెయిన్ గ్రాండ్ ప్రిక్స్ స్థానంలో సెపాంగ్ సర్క్యూట్ను తీసుకురావడంపై చర్చలు జరుగుతున్నట్లు సమాచారం. 2026 ఎఫ్1 సీజన్లో నాలుగో, ఐదో రౌండ్లుగా జరగాల్సిన బహ్రెయిన్, సౌదీ అరేబియా గ్రాండ్ ప్రిక్స్లు రద్దయ్యాయి. మధ్యప్రాచ్యంలో పెరిగిన ఉద్రిక్త పరిస్థితుల కారణంగా ఈ నిర్ణయం తీసుకున్నారు.
ఆ సమయంలో ప్రత్యామ్నాయ రేసులను ప్రకటించలేదు. దీంతో ఏప్రిల్లో నెల రోజుల విరామం ఏర్పడింది. ఆ తర్వాత మయామి గ్రాండ్ ప్రిక్స్ నాలుగో రౌండ్గా నిర్వహించారు. తాజా సమాచారం ప్రకారం, బహ్రెయిన్ స్థానంలో మలేషియా గ్రాండ్ ప్రిక్స్ను నిర్వహించే అవకాశాన్ని ఎఫ్1 యాజమాన్యం పరిశీలిస్తోంది. ఇందుకోసం మలేషియా ప్రభుత్వంతో ఇప్పటికే చర్చలు జరిగినట్లు తెలుస్తోంది.
ఈ రేసును అక్టోబర్ 4న నిర్వహించే అవకాశం ఉంది. బాకు, సింగపూర్ గ్రాండ్ ప్రిక్స్ల మధ్య దీనిని షెడ్యూల్ చేసే అవకాశాలు కనిపిస్తున్నాయి. దీంతో వరుసగా మూడు రేసులు జరిగే ట్రిపుల్-హెడర్ ఏర్పడే అవకాశం ఉంది. సెపాంగ్ సర్క్యూట్ సింగపూర్కు సమీపంలో ఉండటం కూడా దీనికి అనుకూలంగా మారింది. బహ్రెయిన్, సౌదీ అరేబియా రేసులు రద్దు కావడంతో 2026 ఎఫ్1 క్యాలెండర్లో రేసుల సంఖ్య 22కు తగ్గింది.
మలేషియా గ్రాండ్ ప్రిక్స్ చేరితే మళ్లీ మొత్తం రేసులు 23కు చేరే అవకాశం ఉంది. మరోవైపు, ఈ ఏడాది చివర్లో జరగాల్సిన ఖతర్, అబుదాబి గ్రాండ్ ప్రిక్స్లపైనా అనిశ్చితి నెలకొన్నట్లు కథనాలు చెబుతున్నాయి. అయితే ప్రస్తుతం ఆ రెండు రేసులు యథావిధిగా షెడ్యూల్లోనే ఉన్నాయి.
