క‌లం, స్పోర్ట్స్: రాబోయే వన్డే ప్రపంచకప్‌ను దృష్టిలో ఉంచుకుని ఇంగ్లాండ్ బ్యాటర్ టామ్ బాంటన్ (Tom Banton) కీలక నిర్ణయం తీసుకున్నారు. రెడ్ బాల్ క్రికెట్ నుంచి తప్పుకుని, కేవలం వైట్ బాల్ క్రికెట్‌పైనే దృష్టి పెట్టాలని నిర్ణయించుకున్నట్లు ఆయన వెల్లడించారు. బిజీ షెడ్యూల్ కారణంగానే ఈ నిర్ణయం తీసుకున్నానని, దీనికి తానేమీ బాధపడటం లేదని స్పష్టం చేశారు. ఇంగ్లాండ్ కెప్టెన్ హ్యారీ బ్రూక్ నేతృత్వంలో బాంటన్ మళ్లీ పరిమిత ఓవర్ల జట్టులోకి వచ్చారు.
ఇటీవల జరిగిన మ్యాచ్‌లలో జాకబ్ బెథెల్ గాయపడటంతో ఓపెనర్‌గా వచ్చిన బాంటన్, వరుసగా నాలుగు అర్ధశతకాలతో పాటు తన తొలి అంతర్జాతీయ శతకాన్ని కూడా నమోదు చేశారు. వచ్చే ఏడాది వన్డే ప్రపంచకప్ జరగనున్న నేపథ్యంలో జట్టులో తన స్థానాన్ని పదిలం చేసుకోవాలని బాంటన్ భావిస్తున్నారు. కౌంటీ క్రికెట్, ఫ్రాంచైజ్ లీగ్‌లు మరియు అంతర్జాతీయ మ్యాచ్‌ల వల్ల విశ్రాంతి దొరకడం లేదని, అందుకే ఈ నిర్ణయం తీసుకున్నట్లు చెప్పారు. భవిష్యత్తులో సరైన సమయం వచ్చినప్పుడు మళ్లీ రెడ్ బాల్ క్రికెట్ ఆడతానని తెలిపారు.
