క‌లం, స్పోర్ట్స్‌: మోటో జీపీ 2026 ఆస్ట్రేలియన్ గ్రాండ్ ప్రి స్ప్రింట్ రేసులో స్పానిష్ దిగ్గజం మార్క్ మార్క్వెజ్ (Marc Marquez) అద్భుత విజయాన్ని అందుకున్నారు. ఫిలిప్ ఐలాండ్ సర్క్యూట్‌లో శనివారం ఉత్కంఠభరితంగా సాగిన ఈ పోరులో ఆయన ప్రత్యర్థులను వెనక్కి నెట్టి అగ్రస్థానాన్ని కైవసం చేసుకున్నారు. ఈ విజయంతో మార్క్వెజ్ ప్రపంచ ఛాంపియన్‌షిప్ పాయింట్ల పట్టికలో మళ్లీ మొదటి స్థానానికి చేరుకున్నారు. రేసు ప్రారంభం నుంచి హోరాహోరీ పోటీ నెలకొంది. టైటిల్ రేసులో ప్రధాన ప్రత్యర్థి అయిన జార్జ్ మార్టిన్ (Jorge Martin)మొదటి నుంచి గట్టి పోటీనిచ్చారు. మార్‌క్వెజ్‌ను అధిగమించడానికి పలుమార్లు ప్రయత్నించినా, మార్క్వెజ్ సమర్థవంతంగా అడ్డుకున్నారు.
అయితే రేసు ముగింపు దశకు చేరుకుంటున్న సమయంలో, ఎనిమిదో ల్యాప్‌లో జార్జ్ మార్టిన్ ఊహించని విధంగా హై-స్పీడ్ క్రాష్‌కు గురై ట్రాక్ నుంచి కిందపడ్డారు. దీంతో ఆయన రేసు నుంచి పూర్తిగా నిష్క్రమించాల్సి వచ్చింది. మార్టిన్ రేసు నుంచి తప్పుకోవడం మార్‌క్వెజ్‌కు కలిసొచ్చింది. ఎలాంటి తప్పులు చేయకుండా చివరి వరకు తన జోరును కొనసాగించిన మార్క్వెజ్ విజేతగా నిలిచారు. ఇక గ్రేసిని రేసింగ్‌కు చెందిన అలెక్స్ మార్క్వెజ్ రెండో స్థానంలో నిలవగా, వీఆర్‌46 రేసింగ్ రైడర్ ఫాబియో డి గియాన్నాంటోనియో మూడో స్థానాన్ని దక్కించుకుని పోడియంను పూర్తి చేశారు.
