కలం, స్పోర్ట్స్: ఏషియన్ పారా గేమ్స్‌లో భారత బృందానికి ఎదురుదెబ్బ తగిలింది. పారా స్విమ్మర్ మహమ్మద్ శమ్స్ ఆలమ్ షేక్ (Mohammad Shams Aalam Shaikh) పై జపాన్‌లోని హోటల్ మహిళా ఉద్యోగిని వేధించినట్లు ఆరోపణలు వచ్చాయి. ఈ ఘటనపై ఫిర్యాదు అందడంతో జపాన్ పోలీసులు అతడిని అదుపులోకి తీసుకుని ప్రశ్నించారు. అనంతరం అతడిని భారత్‌కు పంపించారు. ఈ పరిణామాలపై అక్టోబర్ 22న తాజా వార్తలు వెలువడ్డాయి. నాగోయాలో భారత బృందం బస చేసిన హోటల్‌లో ఈ ఘటన జరిగినట్లు సమాచారం. మహిళా ఉద్యోగిని ఫిర్యాదు చేయడంతో హోటల్ అధికారులు, భారత బృందం ప్రతినిధులు స్పందించారు. భారత బృందం తరఫున హోటల్ యాజమాన్యానికి క్షమాపణలు కూడా తెలిపినట్లు వార్తలు వెల్లడించాయి. ఈ ఘటన కారణంగా షేక్ పోటీల్లో పాల్గొనకుండానే భారత్‌కు తిరిగి వచ్చాడు.
ఈ వ్యవహారంపై పారాలింపిక్ కమిటీ ఆఫ్ ఇండియా (పీసీఐ) కఠిన చర్యలకు సిద్ధమైంది. షేక్‌పై జీవితకాల నిషేధం విధించాలని బృందం చీఫ్ డి మిషన్ సిఫార్సు చేసినట్లు కమిటీ ప్రకటన తెలిపింది. అయితే, తుది నిర్ణయం ఇంకా వెలువడలేదు. సంబంధిత నిబంధనలు, విచారణ ప్రక్రియ ప్రకారం తదుపరి చర్యలు తీసుకుంటామని పీసీఐ స్పష్టం చేసింది. లైంగిక వేధింపులు, ఇతరుల గౌరవానికి భంగం కలిగించే ప్రవర్తనపై తమకు జీరో టాలరెన్స్ విధానం ఉందని పీసీఐ పేర్కొంది. క్రీడాకారులు అంతర్జాతీయ వేదికలపై క్రమశిక్షణ, బాధ్యతతో వ్యవహరించాలని తెలిపింది. ఈ వ్యవహారంపై ప్రభుత్వం దృష్టికి కూడా సమాచారం తీసుకెళ్లినట్లు ఇచ్చిన వివరాల్లో పేర్కొన్నారు.
